– Vi er alle saman i kampen for økonomisk openheit. Ikkje berre i vårt land, men i alle land, sa presidenten i Panama, Juan Carlos Varela.
Han lovar «energisk» samarbeid med alle etterforskingar som oppstår i etterkant av dokumentlekkasjane frå advokatfirmaet Mossack Fonseca.
Statsadvokaten vil etterforske
Dette blir bekrefta av statsadvokaten i ei pressemelding.
– Opplysningar som er komne fram i samband med lekkasjen av dei sokalla «Panamapapers» vil bli etterforska, skriv statsadvokatkontoret.
OECD: – Panama «det siste store skatteparadis»
Men OECD kritiserer Panama for å ha gjort alt for lite for å kome pengevasking og skattesvik til livs.
– Panama er den siste store skanse for dei som vil gøyme unna pengar frå likningsmyndigheiter og politi, skriv OECD i ein kommentar på avsløringane.
Ifølgje OECD braut nyleg Panama lovnader om å gjere finansinformasjon tilgjengeleg.
– Panama må skape orden i eige hus, skriv OECD.
Fleire har hamna i søkelyset etter lekkasjen. Mellom anna den argentinske presidenten Mauricio Macri, Emirat-leiar Sheikh Khalifa bin Zayed al-Nahayan, den Saudiarabiske kongen Salman bin Abdulaziz, den ukrainske presidenten Petro Porosjenko og den islandske statsministeren Gunnlaugsson.
Foto: - / Afp– Har operert lovleg i 40 år
Advokatfirmaet Mossack-Fonseca seier i ei utsegn at media har gjort ei skeiv framstilling av forretningsdrifta deira.
– Vi har operert i 40 år utan å ha blitt tiltalt for lovbrot, ei heller har vi blitt etterforska, skriv advokatfirmaet på sine heimesider.
Mossack-Fonseca forsikrar dei ikkje hjelper klientane gøyme pengar frå skattemyndigheitene.
Det å nytte skatteparadis er i utgangspunktet ikkje ulovleg. Men det kan bli brukt til å vaske pengar og å unndra seg skatt.
Kor lekkasjen kjem frå
Ifølgje Süddeutsche Zeitung, datt lekkasjen ned i innboksen deira. Avsendar var «John Doe.» Kontakten skulle berre skje over krypterte linjer.
– Livet mitt er i fare, vi kan aldri møtast, skreiv John Doe
– Kvifor gjer du dette, spurde Süddeutsche Zeitung
– Eg vil offentleggjere desse brotsverka, skreiv «John Doe.»
Forretningsdelen av Panama City. Siste store skanse for dei som leiter etter skatteparadis, meiner OECD.
Foto: Arnulfo Franco / Ap– Lekkasjen undergrev Panama som skatteparadis
I bloggen sin meiner Miami-advokat Rijock at lekkasjen kan undergrave tilliten til Panama som skatteparadis.
– Statsleiarar og kriminelle vil søke andre trygge hamner for dei svarte pengane sine, skriv han.
