– Har kutta viktigaste forsyningslinja til IS

– Formålet med offensiven var å blokkere den viktigaste forsyningslinja til IS frå Sinjar til Mosul, og frå Sinjar til Raqqa.

Det er ein strategisk siger at hovudvegen mellom dei to «IS-hovudstadane» no er stengd, fortel Soran Ghorbani til NRK på telefon.

Ghorbani er frilansjournalist, og har vore saman med dei kurdiske styrkane under erobringa av byen Sinjar.

– Mangel på forsyningar førte til at IS-krigarane gjekk tomme for ammunisjon, og raskt tapte terreng mot dei kurdiske styrkane, seier han.

Ghorbani fortel at dei kurdiske styrkane no er i ferd med å lage kringvern rundt byen, for å forsvare den mot eventuelle motangrep frå IS.

Heisa det kurdiske flagget over Sinjar

TV-kanalen «Kurdistan 24», viste i dag bilde av eit digert flagg som vart heist på ei fabrikkbygning.

– Sinjar er frigjort, vi skal aldri la nokon erobre denne byen igjen, seier ein glad Peshmerga-kommandant til «Kurdistan 24».

Ein farleg jobb å sikre byen

– Heile byen vart teken på seks timar, no er den største faren ueksploderte bomber og landminer, fortel Soran Ghorbani til NRK på telefon.

Det skal ikkje vere fare for snikskyttarar, men minefeller og samanraste hus forseinkar sikringsarbeidet.

– Hadde ikkje klart å ta byen utan luftstøtte

Ghorbani fortel at amerikanske jagarfly bomba byen i går og i natt, før dei kurdiske styrkane gjekk til angrep på byen.

– Bombinga var svært effektiv. I går var det rundt 48 luftangrep. Den kurdiske kommandanten seier dei ikkje hadde klart å ta byen utan luftstøtte, fortel Ghorbani.

Er det amerikanske spesialstyrkar i området som hjelper jagarflya med å sikte seg inn på mål?

– Eg har sett britiske og amerikanske spesialstyrkar i området, men dei vil ikkje snakke med media, fortel Ghorbani.

Byen er fullstendig rasert

Bilde frå Sinjar viser at byen ligg i ruinar. Den var opphavleg busett av jesidiar, ein kurdisk religiøs minoritet, som hentar inspirasjon frå kristendom, jødedom og Islam. Dei blir sett på som vantru av islamistane IS.

Jesidiane har vore offer for dei verste overgrepa som IS har stått bak. Som masseavrettingar og seksuelle overgrep mot kvinner.

• LES OGSÅ: HRW: ISIL massehenrettet mellom 160–190
• LES OGSÅ: Video viser IS-krigarar kjøpe jesidi-slavar

– Det finst ikkje sivile igjen i byen, men om lag 7000 jesidiar har gøymt seg i Sinjar-fjellet rett nord for byen, dei har det travelt med å kome seg heim. Men det er ikkje trygt enno, så kurdiske styrkar har hindra folk i å reise inn til byen, fortel Ghorbani til NRK.