Arkiv kastar nytt lys på Kongsvold Fjeldstue

Arkivet frå Kongsvold Fjeldstue er no trygt plassert hos Statsarkivet i Trondheim. I arkivet kan du finne gamle brev, oppskrifter og mykje anna frå heilt tilbake til 1864 og fram til 1970.

- Ein skal behandle materialet med respekt, seier Kristin Vassdal Dahl, masterstudent i Kulturminneforvaltning ved NTNU.

– Det er heilt fantastisk, seier arkivar Gunnar Sørum og ser på ein bunke med brev.

– Me får innblikk i ei verd me elles ikkje ville ha kome til å få oppleve. Me har mange offentlege arkiv, men veldig lite som fortel oss kva folk tenkte og følte før i tida, held han fram.

Prominente gjester

Svært mange av breva i arkivet vart sendt til Oline Synnøve «Lina» Holaker. Fram til 1935 vart Kongsvold drevet som ei statleg fjellstove. Då kjøpte bestyraren, Oline Synnøve «Lina» Holaker husa og heldt fram med å drive fjellstova.

– Her er det massevis av postkort og dei fleste er til Lina, fortel Kristin Vassdal Dahl og viser fram eit postkort frå forfattaren Margrethe Munthe.

– Dette viser at det var svært mange prominente gjester ved Kongsvold og i omgangskretsen til Lina.

Middelalderen

I mange hundre år var Kongsvold ein stad for å søke ly på reisa over fjellet mellom Austlandet og Trøndelag. Frå 1670 hadde staden offisiell status som fjellstove, og i 1704 fikk det navnet Kongsvold av Fredrik IV. Dei eldste husa på Kongsvold er frå gjenoppbygginga etter nedbrenninga under den store nordiske krigen i 1718.

Knut Nyhus driv Kongsvold Fjeldstove i dag.

– Det er fantastisk at så mykje historie har vorte teken vare på. Det er jo både kultur - og mathistorie, seier Nyhus.

Han har testa ut nokre av oppskriftene i arkivet på dagens gjester. Råmelkspudding og bacalao med oppskrifter frå 1920-talet.

– Eg tykkjer det har ein interessant smak. Det er vel det ein seier når ein ikkje veit kva ein skal seie, seier Nyhus og ler.