- Vi er rike på ferdaminne, sa kong Harald i sin tale i høve kroningsjubileet i Trondheim, torsdag føremiddag.
Kong Harald siterte forfattar Åsmund Olavsson Vinje, den gong han la ut på si ferd mot kroninga sommaren 1860:
" Å derfor til fjølls vil eg draga som døl, å kjenningen finna og gløyma meg sjølv. "
Hjarteleg mottaking
- Vinje brukte minst sju veker med skreppe på ryggen. Det går litt fortare i vår tid, sa kong Harald dei mange frammøtte ved Nidarosdomen.
Vidare takka han for all støtte og god mottaking kongeparet har fått på si ferd til Trondheim.
- No kan også vi seie oss rike på ferdaminne, sa kongen.
Ny skattekiste
Kong Harald snakka også om utstillinga av Riksregaliene i sin tale til folket. Han karakteriserte den permanente utstillinga som ei ny skattekiste.
- Olavsskrinet er forlengst ein saga blott, eg føler at vi no opner ei ny og heilt annleis skattekiste. Eit Haakon-skrin, med nasjonale klenodium frå ein konge som bar dei for aller siste gong, sa kong Harald.
Krona er symbol på fridom
Kong Haakon og dronning Maud blei krona 22. juni 1906, i dag for 100 år sidan. Riksregaliene har sidan den tid i eitkvart omstende vore fellesskapet sin eigedom.
- Det føles rett at Riksregaliene no blir gjort tilgjenglege for alle. Noregs krone vil framleis vere symbolet på ein fri, sjølvstendig og demokratisk nasjon, avslutta kong Harald.
Kongefamilien får seinare torsdag omvising i den nye Riksregalie-utstillinga.
