Har ingen stad å parkere bilane

Hytteeigarar ved Skinnarbu i Tinn har venta i 35 år på at Tinn kommune skal skaffe dei parkeringsplass. Statens vegvesen fjerna parkeringsplassane hytteeigarane hadde ved fylkesveg 37 da vegen blei utvida ein gong på slutten av 70-talet.

For hytteeigar Elisabeth Samuelsen er det frustrerande å møte stadig nye hindringar.

– Dei små parkeringsplassane vi hadde blei fjerna, og vi fekk ingen nye, seier Samuelsen.

Om vinteren forsøker mange å grave seg inn i vegkanten, men der er det heller ikkje lov å lage parkeringsplass.

Parkeringsplass utan veg

Det er ein parkeringsplass langs fylkesvegen ved Møsvatndammen. Men der fekk hytteeigarane beskjed av politiet at det var ulovleg med døgnparkering, og fekk parkeringsbøter.

– Så i praksis har vi ikkje parkering for bilane våre når vi er på hytta, seier Samuelsen.

Hytteeigarane har fått eit område som er regulert til parkeringsplass i 1980, men dit får dei ikkje lage ny veg.

Samuelsen seier Tinn kommune nekta å bygge veg via innkøyringa til ein bustad.

– Øst-Telemarkens Brugseierforening har fått nei to gonger av vegstellet om å lage veg til dette området, seier Samuelsen.

Vegvesenet har fleire alternativ

På kontoret i Statens vegvesen blar Eivind Gurholt i bunken av dokument i saka, og finn det første dokumentet frå 1977. Vegvesenet opplever at bruken av areal spissar seg til i mange område med gamle og halvgamle hytter.

– Det er fleire alternativ for å lage ny avkøyrsel til parkeringsområdet og hyttene, ein av dei er i avkøyrselen til den nye bustaden der, seier Gurholt.

Men for at vegstellet skal kome vidare i sitt arbeid er dei avhengig av planarbeidet i Tinn kommune.

– Ein reguleringsplanen for området er nøkkelen til å kome vidare, seier Gurholt.

Vil bygge fleire hytter og bustader

I Tinn kommune får NRK opplyst at planprosessen går føre seg, men reguleringsplanen er ikkje komen til kommunen enno.

Øst-Telemarkens Brugseierforening engasjerte for eitt år sidan eit firma til å lage ny reguleringsplan for området.

Nicolai Østhus seier at Brugseierforeningen ønskjer å lage ein plan for tjue nye hytter og bustader i området saman med andre grunneigarar.

– Vi ønskjer å utvikle området som eigedom i lag med nabogrunneigarane, seier Østhus.

Og Østhus lovar at planen vil innehalde nye parkeringsplassar.

– Det er ein sjølvsagt føresetnad for planarbeidet at alle hytter skal ha parkeringsplass, seier Østhus.

Her kan du høyre radioinnslaget: