Sterk tredjeplass i Femundløpet

15 år gamle Torjus Mortensen Bakk frå Porsgrunn debuterte med en sterk bronseplass i i sledehundløpet Femundløpet.

• Anette Børve Hernes er norgesmester
• – Jeg synes det er skikkelig tungt
• Roar Kvilvang er norgesmester

Etter 21 mil bak hundesleden i kulde og uvær ble det i helga 3. plass i hans første deltaking i junior-NM.

– Det var veldig gøy og ei veldig flott oppleving, seier Mortensen Bakk som var gjest i Telemarksendinga.

Han hadde gleda seg mykje på førehand og synest det var gøy å kunne gjennomføre løpet.

– Og særleg når det gjekk såpass bra, seier Mortensen Bakk.

(Artikkelen held fram under bilete)

Fekk problem siste mila

Femundløpet for junior går over 210 kilometer, og Torjus Morten Bakk var ute i sporet bak hundesleden i godt over eitt døgn.

– Men det gjekk eigentleg ganske fort, samstundes følte eg det som det var lenge sidan eg hadde starta då eg kom til mål, seier han.

Torjus Mortensen Bakk seier han ikkje merka så mykje til at han blei trøytt det første døgnet på grunn av all spenninga.

– Eg merkar det mest når eg skulle stå opp igjen etter å ha sove eit par timar, men det går fort over, seier han.

Siste mila før fekk Torjus litt problem. Han kom inn til andre plass ved Tufsingdal, men tapte den plassen innan han kom til Tolga.

Det blei ein strevsam tur over Gråhøgda, men tredjeplassen var sikra, og i mål hadde han med seg alle hundane.

– Det var siste mila før mål, då vi skulle over fjellet, før vi kjørte ned til Røros. Det blåste veldig opp, og eg sleit med å sjå stikkene for løypa, seier Mortensen Bakk.

Hundane la seg ned i uværet

Hundane var ikkje så vant til slikt vær, fordi dei er for det meste trent i Luksefjell, så dei la seg ned og ville berre ligge der. Då prøvde han å bytte om på leiarhunden og snakke til dei, men hundane ville ikkje gå vidare.

– Først etter ein time klarte eg å få hundane i gang igjen. Og då sprang eg foran og leita etter stikkene, mens eg ropte etter dei og då kom dei springane etter, fortel han.

Men nede frå fjellet roa vinden seg og hundane følgde løypa mot mål.

Hundane låner han av den kjende sledehundkjøraren Tore Bergby som bur i Luksefjell i Skien.

– Så eg er hos han for å trene og låner hundar av han.Og alt eg kan om hundekjøring har eg lært av han, seier Torjus Mortensen Bakk.

Han har alltid vore glad i hundar, friluftsliv og vinter. Og han likar samspelet mellom hundar og sledekjøraren.

– Det er veldig gøy å vere saman med hundane og tilbakelegge mange kilometer i flott natur, seier han.

Førebels tar han eitt år av gangen, og har ikkje satt seg noko mål enno.

(Artikkelen held fram under bilete)

Mora var spent og stolt

Mora Nina Mortensen var med som handler saman med Tore Bergby. Oppgåva hennar var blant anna å sørge for mat til hundane på sjekkpunkta og i mål.

Men det var Tore Bergby som fekk lov å kome innafor gjerdet med maten til hundane.

– Men eg fekk ikkje lov til å gjere noko, og måtte berre stå å sjå på, seier Mortensen.

Ellers er oppgåva å sørge for at Torjus får mat og søvn undervegs. Ho opplevde det både som gøy og litt skummelt å sende sonen ut i ødemarka med hundesleden.

– Eg ser jo at han er veldig flink. Men eg var veldig spent då han sleit oppe på fjellet med hundane, seier Mortensen.

Ho fekk rapportar undervegs, og fekk også snakke med han på telefonen.

– Og eg høyrde på han at han takla det, sjølv om det var vanskeleg. Men dei siste par timane var spennande, seier Mortensen.

Men det var fantastisk for Nina Mortensen å oppleve at sonen kom gjennom målområdet og inn til 3. plass i junior-NM.

Og Torjus Mortensen Bakk har som mål å kunne delta i Femundløpet også til neste år.