Måndag var fleire sentrale politikarar i Grenland for å lekke frå statsbudsjettet. Nyheita var at det blir løyvd 100 millionar kroner i komande statsbudsjett til bygging av ny jernbanetrase mellom Larvik og Porsgrunn.
Det opnar igjen for ei samankopling av Vestfoldbanen og Sørlandsbanen. Meir enn 20 års kamp ser ut til å vere over.
Artikkelen held fram under biletet.
Slut på togbussar
Folk er vande med at tog mellom Larvik og Porsgrunn er forseinka. NRK gjorde i si tid ein test som synte at det var like raskt å sykle strekninga som å ta toget. Nå går det mange togbussar i Porsgrunn. Det blir det snart slutt på.
– Det blir heilt slutt på det når vi får bygd den nye parsellen, seier prosjektleiar Lars Tangerås i Jernbaneverket.
Med løyvinga som no kjem i statsbudsjettet fjernar ein den største hindringa for ei samankopling av Vestfoldbanen og Sørlandsbanen. Tangerås seier at dette vil redusere reisetida kraftig. I dag tek det åtte timar frå Stavanger til Oslo.
Oslo og Stavanger på 3,5 time
– Det er snakk om reisetider mellom Oslo og Stavanger på 3,5 time, med det er og andre prosjekter som skal realiserast før det blir den reisetida, seier Tangerås.
– Det at det no er løyvd 100 millionar til igangsetting, betyr det at prosjektet ikkje kan stoggast?
– Når du får ein oppstartsløyving, som er pengar som er øyremerka til bygging i marka, er det lite sannsynleg at prosjektet vert stogga.
– Dette har vi venta på
Vedvarande politisk press i 20 år har gjort at denne gordiske samferdselsknuten no ser ut til å vera løyst. På høg tid meiner Oddvar Skaiaa i Jernbaneforum sør.
– Det vil igjen opne opp for at vi også så raskt som mulig må kome i gang med vidareføringar mot Sørlandet frå Porsgrunn. Det er gledelig at vi har kome i gang, dette har vi venta på, og sloss for veldig lenge. Ein slik reduksjon i reisetida vil revolusjonere transporten frå Stavanger og Sørlandet mot Austlands-området. Vi får ein heilt ny bo- og arbeidsmarknad, seier Skaiaa.