Hopp til innhold

Ordførar set bom for bom

Bjørg Tveito Lundefaret (Ap) vil i dag prøve å stoppe arbeidet med å plassere ein bom på riksveg 36 mellom Slåttekås og Årnes. Ordføraren i Nome vil utsetje prosjektet til fylket finn ei løysing for den trafikkfarlege Lannavegen.

Bjørg Tveito Lundefaret

Ordførar Bjørg Tveito Lundefaret (Ap) klarer truleg å overtale samferdselsutvalet.

Foto: Anne Lognvik / NRK

I dag skal Hovudutvalet for samferdsel i fylket strø sand på planane om å bygge ut riksveg 36 mellom Slåttekås og Årnes for 336 millionar kroner. Prosjektet skal bomfinansierast, og bommen skal stå på Årnes, nær kommunegrensa mot Sauherad.

Kan bli stogga i tolvte time

Men i dag prøver ordføraren å stogge prosjektet.

– Opplysningar frå Statens vegvesen syner at ein bomstasjon mellom Ulefoss og Årnes vil flytte deler av trafikken frå riksveg 36 over på Lannavegen. Statens vegvesen reknar med ein «lekkasje» på 1000 bilar i døgeret. I så fall får den sterkt nedkøyrde og svært trafikkfarlege Lannavegen større døgntrafikk enn riksveg 36, seier Bjørg Tveito Lundefaret.

Lannavegen.

Statens vegvesen har rekna ut at Lannavegen kan få ein døgntrafikk på 2.500 bilar dersom det kjem bompengeinnkrevjing på riksveg 36.

Foto: Statens vegvesen

Før møtet i samferdselsutvalet i dag skal Bjørg Tveito Lundefaret møte den raudgrøne posisjonen og den blå opposisjonen.

– Der vil eg be om ei løysing for Lannavegen no, eller at planen om å bomfinansiere riksveg 36 mellom Slåttekås og Årnes blir utsett til løysinga på Lanna er på plass, seier Tveito Lundefaret.

Set fylkeskommunen i klemme

Med det set ordførar i Nome fylkeskommunen i ei klemme. På den eine sida er det naudsynt med eit vedtak no, slik at Stortinget kan godkjenne planen i sommar. I så fall kan den omfattande vegutbygginga starte som planlagt i 2015.

På den andre sida blir det vanskeleg samferdselspolitikarane i fylket å presse planen gjennom, til protestar frå Nome.

Sigbjørn Molvik (SV), som er leiar i Hovudutvalet for samferdsel, seier at han vil vente til etter møtet med ordføraren i dag med å ta stilling til kravet.

Sigbjørn Molvik

Sigbjørn Molvik (SV) er leiar i Hovudutvalet for samferdsel.

Foto: Kristin Rivrud / NRK

– Det er lett å forstå at ordføraren i Nome mislikar tanken på meir trafikk på Lannavegen. Men samstundes er det slik at vi må gjere eit vedtak no for å gjennomføre prosjektet etter planen, seier Sigbjørn Molvik.

Ordføraren ber om bru

Ordførar Bjørg Tveito Lundefaret ynskjer ei løysing med bru over vassdraget frå Stoadalen til Kastet.

Brua vil føre trafikken bort frå Lanna, og på den måten fjerne eit av dei store trafikkproblema i midt-Telemark.

Avviser utpressing

Nome-ordføraren går ikkje med på at ho driv politisk utpressing mot fylket.

– Eg forstår at det kan oppfattast slik. Men sett frå Nome er det tvingande naudsynt å få ei løysing for Lanna før bompengeinnkrevjinga på riksveg 36 tek til, seier Bjørg Tveito Lundefaret.