Politiet opplyser i ei pressemelding at det blir etablert ei total flyforbodssone i Skien i samband med rettssaka Anders Behring Breivik har reist mot den norske stat i tidsperioden frå og med 14. mars 2016 til og med 18. mars 2016.
Flyforbodet gjeld all flyging i sonen, både fartøy med og utan fører.
– Politiet har ansvaret for tryggleiken på utsida av fengselet. Vi skal vareta tryggleiken til alle som bor i Grenland og har derfor valt å etablere flyforbod i den aktuelle tidsperioden. Vi må ta høgde for alle eventualitetar, seier Annie Sandersen, driftseiningsleiar i Grenland.
Har saksøkt staten
Anders Behring Breivik har saksøkt staten for brot på menneskerettane, og Oslo tingrett behandlar av tryggingsomsyn og praktiske årsaker saka i eit provisorisk rettslokale i høgsikringsfengselet i Skien, der Breivik soner.
Saka startar tysdag 15. mars, og retten har sett av fire dagar til behandlinga. Flyforbodet får ei utstrekning på vel 4,5 kilometer og 2.500 fot, og gjeld frå 14. til 18. mars. (Sjå kart øvst i saka)