– Her ser du eg set på blinkljoset til venstre for å signalisere at eg skal lengre enn halvvegs i rundkøyringa, då kan dei som kjem frå venstre senke farta og gje meg ei luke, slik at eg kjem inn. Dette er viktig når det er mykje kø, seier Preben Utsig.
NRK blei med Utsig ut i trafikken i Skien for å sjå på førhalda.
Dårlege på å gje signal
Oppe ved Myren i Skien står me og ser ned på ei rundkøyring. I løpet av om lag eit kvarter, har berre rundt halvparten av bilistane blinka seg ut av rundkøyringa.
Dette var stadfesta av tall som trafikksikkerhetsforeningen i Asker og Bærum har utarbeida, det skriv Budstikka. Desse syner at berre to av tre nyttar blinkljos i rundkøyringar.
– Når ein skal lengre enn halvvegs i rundkøyringa bør ein blinke til venstre. Det vil auke flyten i trafikken, seier Utsig.
Han er overraska over at so få nytta blinkljos ut av rundkøyringa, og hadde håpa det var betre.
– Blinkljoset er ikkje for ein sjølv, so ein skal hugse å svinga av. Blinkljoset er for at andre skal vite kvar du skal, seriar han.
- Les også:
Ikkje berre blinkljos
Utsig fortel at det er ikkje berre blinkljoset bilistar syndar mot. Ein av kollegaene hans ved trafikkskulen kjem køyrande frå Larvik kvar dag, og har dårleg erfaring med ljoskryss og rushtrafikk i Grenland.
– Her i Grenland køyrer ein ut i krysset sjølv om det ikkje er klart på andre sida. Det hadde han aldri sett før han kom hit til Grenland.
Grenlandsrøysta er klar
Ute blant folk i Grenland er meininga klar, folk bruker ikkje blinkljos i rundkøyringane.
– Ein aner ikkje kva dei gjer, skulle tru det var i gamledagar og dei brukar høgrearmen for å syne kvar dei skal, seier Per Tolefsen.
Sjølv legg han ikkje noko i mellom, og fortel at han er flink til å nytte blinkljos.
Betre i byen
Utsig seier at ein skulle tru at bilistane i Grenland var flinkare til å unngå kø enn dei er i dei store byane, fordi her er det stort sett berre bilar ein må ta omsyn til.
– I byane har dei mykje meir ein må ta omsyn til i trafikken. Trikkar, bussar, – og mange fleire folk. Der er dei flinke til å kommunisere med kvarandre, fordi dei må.
Han trekk fram byar som Stavanger, Bergen og Oslo, som døme på stader der trafikken flyt godt.