– Eg måtte prøve å berge meg frå «a complete disaster» (ein total katastrofe), var uttrykket ho sjølv brukte i intervjuet etter turneringa.
Ho fekk den verst tenkelege starten på runden: Dobbelbogey (to slag over par) allereie på det første holet.
– Det var ein heilt forferdeleg start, og det tok meg ti hol å kome inn i rytmen igjen, sa Tutta.
For mykje adrenalin?
– Eg veit ikkje kvifor det skjedde. Kanskje eg hadde for mykje adrenalin? Det var rett og slett ikkje mogeleg å slå tilbake etter den starten, sa 33-åringen.
Då hadde dobbelbogeyen i opninga blitt følgt av bogeyar på hol 4, 6 og 8. Hol 14 og 15 gav birdiar, men det vart ny bogey på det 18. og siste holet. Det gav fire slag over par på den siste runden.
Koreansk siger etter omspel
Det som før siste runden såg ut som ein tetkamp og kamp for årets første turneringssiger, enda med sjetteplass, fem under par totalt og seks slag bak vinnaren Park In-bee frå Korea.
– Eg var ivrig etter å kome i gong på den siste runden, men det gjekk ikkje. Men det var likevel mykje godt i spelet mitt. Eg må prøve å halde hovudet heva og dra det beste frå denne runden med meg til neste turnering, sa Tutta.
Park vann turneringa etter omspel med amerikanske Brittanny Lincicome. Amerikanaren såg ut til å gå mot siger, men fekk ein bogey på det siste holet. Dermed vart det omspel, som Park avgjorde på første hol.