Søderlund hadde alle tiders sjanse til å sende Rosenborg i føringa mot Stabæk då det stod 1-1 med 20 minutt igjen av kampen.
Heilt aleine, éin meter framfor opent mål klarte han å bomme.
– Det var heilt utruleg. Han blir alt for nonchalant i den situasjonen. Ballen blir servert framfor open kasse, men Søderlund er for avventane. Ein utruleg stor miss, seier Karl-Petter Løken.
NRKs fotballekspert scora for øvrig då Rosenborg slo Stabæk 5-2 i det første 16.-maimøtet mellom dei to klubban på Lerkendal i 1995.
Verre blei det for Søderlund etter missen. For plutseleg skrudde Stabæk opp tempoet og scora to gangar.
Luc Kassi og Franck Boli blei dagens heltar for Stabæk.
Med mål i det 73. og 79. minutt sikra dei Stabæks sjette triumf på Lerkendal.
Sist dei vann i Trondheim var i 2011.
Slått av Haugesund, Hønefoss og Stabæk
Rosenborg har ingen plettfri 16.-mai-CV mot mindre lag på Lerkendal dei siste åra.
I 2012 stakk Hønefoss av med tre poeng då Christoffer Dahl scora kampens einaste mål.
I 2011 vann Haugesund 1-0 i Trondheim.
Forsvarsspelar blei toppscorar for Rosenborg
Stabæks Fredrik Brustad scora kampens første mål etter strøkent contringsspel.
Tore Reginiussen utlikna etter pause. Forsvarsspelaren er no mestscorande for Rosenborg denne sesongen.
Med tre scoringar på ni kampar deler han toppscorartittelen med nettopp Alexander Søderlund.