Cardiff-supporterane jublar over Solskjær-tilsetting

I dag vart det klart at tidlegare Manchester United-spelar, og Molde-manager, Ole Gunnar Solskjær tek over managerrolla i den walisiske Premier League-klubben Cardiff.

• LES OGSÅ: Wenger: – Solskjær vil lukkast

Til stor glede for norske Cardiff-supporterar.

• LES OGSÅ: «Eg håpar vi aldri rykkjer opp til Premier League»

– Det er den beste manageren vi kunne fått. Eg trudde aldri vi skulle få ein så dyktig manager, jublar Anders Sigdestad, leiar i Cardiff sin skandinaviske supporterklubb.

Håplaus sparking

Rykta kring den tidlegare landslagsspissen byrja å svirre kort tid etter at styret og klubbeigar Vincent Tan gav Malky Mackay sparken for fem dagar sidan.

• LES OGSÅ: – Fleire har bedt meg tenkje meg om

I dag vart det altså klart at den tidlegare United-yndlingen erstattar Cardiff sin mest suksessfulle manager. Av 125 spelte kampar, har Mackay måtte sjå sine spelarar tape 34 kampar. I fjor trona dei øvst i Championship og vart med det den andre walisiske klubben i Premier League, saman med Swansea.

• LES OGSÅ: Då dette skiltet skulle skruast opp, nekta Åge plent å løfte ein finger

– Eg tykkjer sparkinga var heilt håplaus. Mackay gjorde ein god jobb og har den beste statistikken med klubben. I fjor tapte vi knapt ein kamp på heimebane. Vi hadde vel to. Og så har det ikkje gått så alt for dårleg i år heller, seier Sigdestad.

Sir Ferguson som læremeister

(Artikkelen held fram under biletet)

Den tidlegare Molde-manageren tek over eit nyopprykka Cardiff som med to sigrar på ti siste kampane har segla nærare og nærare nedrykksstriden. Med 18 poeng har dei eitt poeng meir enn Crystal Palace.

Solskjær har leia Molde til to seriemeisterskap og eitt cupmeisterskap. Leiaren av supporterklubben trur Solskjær også vil lukkast med FA-cupvinnaren frå 1927.

• LES OGSÅ: Ray har brukt 1,4 millionar kroner på banehopping - til no

Sjølv om det å leie lag i Norge er noko heilt anna enn å leie lag i England.

– Han har spelt i Premier League, vore ein dyktig trenar for mellom anna reservelaget til United. Han har hatt ein god læremeister i Sir Alex Ferguson, så dette trur eg han taklar heilt fint, seier Sigdestad.

Som Sir Ferguson

– Eg håpa han skulle gjere det bra i Molde og hadde vel aldri trudd at vi skulle få han som manager i Cardiff. Han er ein framtidig landslagstrenar og Premier League-trenar.

– Du trur Cardiff vil få si stordomstid?

– Ja, no satsar vi på at Solskjær gjer som Sir Ferguson gjorde i United. Det handlar om å unngå nedrykk i år, og så byggje seg opp over tid. Så blir dette svært bra.

Håpar på første nordmann

Unødig å seie, Sir Alex Ferguson er engelsk fotballs mestvinnande manager nokosinne som manager i Manchester United i over 26 år. Frå 1986 til 2013 leia skotten klubben til 38 trofé, mellom desse 13 i Premier League og to i meisterligaen.

– Det blir sagt at han har fått lovnad om å bruke 250 millionar på spelarar, og ser vel ikkje vekk ifrå at han kan hente nokre spelarar frå Molde.

– Cardiff har ikkje hatt nordmenn i klubben før, så kven du håpar blir den første?

– Eg skulle helst sett ein spiss, men der er vel ingen i Molde som peikar seg ut. Derimot er Mats Møller Dæhli og keeper Ørjan Nyland spennande spelarar og to spelarar for framtida. Even Hovland har eg også alltid hatt sansen for, så det hadde vore kult å sett han i Cardiff.

Større interesse

Den Skandinaviske supporterklubben har allereie merka auka interesse etter at spekulasjonane byrja å rulle rundt Cardiff og Solskjær. Dei siste åra har klubben hatt kring 35 medlemer, medan toppåra med 60 medlemer var tida der Jimmy Floyd Hasselbaink og Robbie Fowler spelte i klubben.

– Eg trur kanskje vi vil merke større interesse no, og har allereie sett på Twitter at folk vil halde litt med Cardiff no som Solskjær er der.

– Vi har halde låge budsjett, men det vi må vel sleppe litt opp no. Det spørst om vi ikkje må til med medlemskort att, humrar Sigdestad og håpar klubben kan komme opp i 60–70 medlemer.

P.S. Ein ting Cardiff-supporterane får ein grei jobb med, er å tilpasse hymnen til eigen klubb til nytilsettinga. Hymnen United supporterane laga til Ole Gunnar Solskjær i hans aktive tid har nemlig same melodi som hymnen til Cardiff: