– Dette er noko av det største eg har opplevd, seier Finn Aamodt, som er hovudtrenar for tekniske idrettar på Olympiatoppen.
Onsdag såg Aamodt snøbrettcross-køyraren Stian Sivertzen ta sin første verdscupsiger etter det dramatiske uhellet som gjorde han lam i 2009.
Ingen kunne tukte nordmannen, som vann framfor amerikanske Alex Tuttle og franske Tony Ramoin.
– Ingen lege trudde eg kunne greie dette, men eg gjorde det, jubla Sivertzen i målområdet.
– Vi har alltid hatt trua på han
Men vegen til triumfen har vore lang og hard. Sivertzen fekk rift i hovudpulsåra og brakk kragebeinet då han gjekk på trynet under prøve-OL i Canada for tre år sidan.
I tillegg fekk han brist i nakken, ryggen og bekkenet. Etter mange operasjonar måtte nordmannen lere å gå og køyre på snowboard igjen.
Finn Aamodt var til stades då det gjekk gale for Sivertzen i Cypress Mountain.
– Eg såg han låg i båra, og at legen stod over han då sjukebilen kom. Eg har følgt han sidan den gongen. Han har gjort ein formidabel jobb i mange år. Vi har alltid hatt trua på han, seier Aamodt.
Olafsen: – Som ein storebror for meg
Også lagvenninne og tidlegare VM-vinnar Helene Olafsen har støtta Sivertzen på vegen tilbake til toppen. For Olafsen var onsdagens triumf emosjonell.
– Han er som ein storebror for meg. Vi har reist og opplevd mykje saman. Eg unner han dette så sinnssjukt etter det han har vore gjennom, seier Olafsen på telefon frå USA.
– I 2009 blei han gitt 80 prosent sjanse for å overleve. Å komme seg etter det var ei utfordring nok. Dette er rett og slett eit medisinsk under, legg Olafsen til.
VIDEO: Sjå Stian Sivertzen sikre sin første verdscupsiger etter skadehelvetet
Fekk epileptiske anfall etter koma
Kort tid etter uhellet i 2009 fortalde Sivertzen om sin dramatiske historie. På bloggen hans kunne ein mellom anna lese dette:
«To uker senere, da jeg kom hjem, fikk jeg to epileptiske anfall og gikk rett i bakken. Ble flydd med helikopter til Ullevål sykehus og måtte operere hovedpulsåra på nytt. Tilstanden min da var veldig kritisk, og etter fem dager i koma våknet jeg og hadde ikke følelser i venstre bein. Neste dag fikk jeg tilbake følelsen, men det å gå var ikke så lett. Kom meg så vidt opp på beina, men sleit veldig med balansen.»
– Best i verda då han skada seg
Både Olafsen og Aamodt beskriv eit unikt brettalent i Sivertzen. I dag er dei lukkelege for at han aldri gav opp, trass utfordringane.
– Eg sa at så lenge han hadde tru på seg sjølv, skulle eg tru på han. Stian var verdas beste då han la opp. Særs få har like god brettkontroll som han. No har han funne tilbake til det han hadde før han skada seg, seier Olafsen.
Lagvenninna stod nemleg forbausa og såg Sivertzen køyre mot gull i X-Games-finalen tidlegare i år, men det heldt ikkje heilt inn.
Så god køyring hadde heller ikkje Aamodt venta av brettvidunderet.
– Han var veldig nær. Men like før slutt knakk han bare saman. Då sa eg at: «no får du stå på og trene litt ekstra knébøy, så blir dette bra,» seier Aamodt.
– Men no tok han altså sin første siger etter skaden i 2009. Er dette ein av dei mest alvorlege skadane nokon har reist seg frå – så raskt – i norsk idrett?
– Aksel Lund Svindal kom jo tilbake. Skaden hans i USA var ganske alvorleg, den også. Det som var dramatisk for Stian var at dei ikkje fann ut noko om riften i hovudpulsåra før han blei overført til eit anna sjukehus, noko som kunne blitt alvorleg.
– Veldig mange idrettsmenn har jo komme tilbake etter skader, men også Stian har gjort ein heilt vanvittig bra jobb, seier Aamodt.
Aamodt: – Unner han OL-medalje meir enn alle andre
No har både Olafsen og Aamodt tru på at 22-åringen kan bli stor i brettsirkuset.
– Han har vakse mykje gjennom dette. Det er heilt klart at han kjem til å bli verande i toppen, seier Olafsen.
Om to år er det OL i Russland. Der kan Sivertzen bli farleg for konkurrentane.
– På sitt beste er det ingen som slår han. Det er ingen andre eg unner ein OL-medalje enn Stian i Sotsji, avsluttar Aamodt.