- Svært sannsynleg at ein skiskyttar går i VM-stafetten

- Slik eg ser det, er ein skiskyttar det sikraste kortet dei har, seier Svendsen til NRK.

- Kva seier du om at nivået på langrennsløparane ikkje er betre?

- Går styggfort

- Det vil eg ikkje seie noko om. Det eg kan seie, er at skiskyttarane går styggfort, og det er bra for Noreg.

Svendsen er dermed klar i sitt syn i diskusjonen om langrennsløparane kontra skiskyttarane når det gjeld langrenn i skøytetektnikk.

- Skiskyttarane har mykje dårlegare konkurranse, seier langrennssjefen. - Nei, det er ikkje mange i Noreg som slår oss i skøyting, seier skiskyttarsjefen.

Etter at tre skiskyttarar har signalisert at dei vil slåst for ein plass på stafettlaget under ski-VM, samstundes som ingen av langrennsløparane bak Petter Northug har overbevist, har diskusjonen blussa opp: Er dei beste norske langrennsløparane i fri teknikk - bortsett frå Petter Northug - å finne blant skiskyttarane?

Kva meiner du? Diskuter i slutten av artikkelen!

- Vi har tøff konkurranse

For skiskyttarane dominerte stort i sesongopninga i Östersund, og dei norske hadde beste langrennstid.

- Eg synest langrenns-nivået hos oss er bra. Det er tøff konkurranse i skiskyting, og det er mange nasjonar som er med og som hevdar seg, seier sportssjef for skiskyttarane, Per Arne Botnan.

Han er ikkje utan vidare samd med langrennssjef Åge Skinstad om at det er dårlegare konkurranse i skiskyting enn det er hos langrenns-spesialistane.

Bjørndalen nummer 25

- Vi er glade for at dei er gode langrennsløparar og at dei har lyst å konkurrere om stafettplass, seier Skinstad.

- Men dei konkurrerer trass alt mot skiskyttarar. Og det er nok ikkje riktig så godt langrennsnivå der som i verdscupen i langrenn, seier Skinstad til NRK.

Han viser til at Ole Einar Bjørndalen berre vart nummer 25 i verdscup-opninga i Gällivare.

Landslagsløparane langt bak

Men i tremila i norgescupen i Meråker i Meråker laurdag, der Petter Northug vann, var det langt mellom landslagsløparane bak trønderen. Tord Asle Gjerdalen, Petter Eliassen og Kristian Tettli Rennemo vart nummer 8, 9 og 14.

Og både Lars Berger, Ole Einar Bjørndalen og no sist også Emil Hegle Svendsen har signalisert lyst til å gå tredjeetappen i langrennsstafetten i VM i Holmenkollen 4. mars. Den etappen går i skøyting.

- Vi er ikkje bekymra

- Kvifor er skiskyttarane i form, og ikkje langrennsløparane bak Petter?

- Langrennsløparane bak Petter gjekk på Beitostølen, og vi såg korleis skiskyttarane plasserte seg der. Vi har mange gode løparar, og det er enno lenge til VM, så eg er ikkje bekymra. Vi har mange kandidatar, og det vil vere dumt å endre på noko opplegg no. Vi har tru på det vi held på med, seier Skinstad, og legg til:

- Også dei rutinerte skiskyttarane som Bjørndalen, Svendsen og Berger kjem til å gå fortare seinare i sesongen enn det dei gjer no.

- Det kan kanskje bli litt spesielt å samanlikne med langrenns-spesialistane, men eg trur nivået blant våre løparar er godt. Det har vi sett både av Ole, Ronny (Hafsås)og Lars, dei presterer på høgde med dei aller beste i Noreg, seier Botnan til NRK.

Vil på VM-laget

Skiskyttarane har meldt seg på konkurransen om å få gå tredje etappen i stafetten i Holmenkollen under VM, men langrennssjef Åge Skinstad meiner dei framleis har eit stykke opp dit.

Per Arne Botnan er usamd og meiner gutane hans fint kan hevde seg også i langrenn. Ikkje minst fordi dei er spesialistar i skøyting.

For ingen av dagens landslagsløparar i langrenn, utanom Petter Northug, har nokonsinne vunne eit verdscuprenn i langrenn i fri teknikk. Det har skiskyttarane Ole Einar Bjørndalen, Lars Berger og Ronny Hafsås gjort.

- Få skøyterenn

Og både på normaldistansen og skiskyttarsprinten i Östersund hadde norske løparar dei fire beste langrennstidene.

- Kvifor trur du det er så vanskeleg å få fram gode langrennsspesialistar i skøyting, Botnan?

- Det er det eit todelt svar på, trur eg. Ei av årsakene er at det er så få skøyterenn at ingen vil satse fullt og heilt på det. Då blir det for få konkurransar i løpet av ein sesong. Og skal du satse på begge stilartene, vil det krevje sitt. Det er ingen lett kombinasjon.

- Korleis trur du Emil Hegle Svendsen hadde hevda seg i langrenn akkurat no?

- Med den formen han er i no, trur eg ikkje det er mange utanom Northug som hadde gått frå Emil i skøyting i Noreg. Også Ole hadde slått dei fleste - han hadde også beste etappetid på langrennsstafetten i Gällivare, seier Botnan.