Landslagsløpar: – Trudde min siste time var komen

Torsdag førre veke: Hans Christer Holund og resten av landslaget hadde 18 dagar med lange turar på ski bak seg på den italienske breen.

Dei skal ut å gå dei siste timane før dei reiser heim til Noreg. Men etter eit kvarters tid må Hans Christer Holund berre legge seg rett ned i snøen.

– Eg klarte ikkje å puste skikkeleg og fekk rett og slett ikkje nok luft, fortel Holund.

Lyn-løparen frå Nittedal er ny på landslaget denne sesongen etter ein sterk sesong i fjor med fjerdeplass i verdscupen i Østersund og sjetteplass på femmila i Holmenkollen.

Mista følelsen i armen

Mot alle odds er han nå faktisk på veg til den nasjonale opninga på Beitostølen, men opplevinga i Val Senales førre veke sit framleis godt i.

– Der og da trudde eg oppriktig talt at min siste time var komen. Eg kjente det med ein gong eg begynte å gå. Men da eg kom bort til drikkebeltet etter eit kvarters tid eskalerte det. Plutseleg mista eg følelsen i armen, pusteproblema blei verre og eg måtte berre legge meg rett ned. Da blei naturleg nok dei rundt meg og eg uroa.

Ambulansen blei ringt og helikopter kom opp til 3000 meters høgde for å hente Holund ned til sjukehuset i Zams i Austerrike.

I helikopteret følte 26-åringen seg trygg.

– Det verste var minutta på ski da eg heldt på å svime av, det var verkeleg skremmande. Eg har aldri hatt pusteproblem tidlegare og lungene er jo eigentleg det som har fungert best på kroppen, seier Holund som er kjent for å ha ein enorm lungekapasitet.

LES SAKA: Holund føler seg ikke ydmyket

Mål om pallen i verdscupen

Vel nede i låglandet igjen gjekk alt så mykje betre.

– Da eg kom ned på sjukehuset følte eg meg mykje betre. Legane fann heller ikkje noko alvorleg. Nå har eg trena normalt sidan fredag og føler meg frisk.

Testane han har tatt etter at han kom til Noreg har heller ikkje funne kva som var årsaka til den dramatiske hendinga. Sjølv trur Holund det kan vere nøtteallergien som kan vere grunnen.

Nå er han uansett klar for Beitostølen i sin fyrste sesong som landslagsløpar. I år vil Hans Christer Holund bli kjent for meir enn å vere han som Petter Northug leika med i NM-stafetten.

– Eg slår nok ikkje like godt frå meg i intervju som Northug, men eg skal slå frå meg i skiløypa. Målet er pallplass i verdscupen, seier Holund som har friplass i verdscupen fram til jul som regjerande vinnar av Skandinavisk cup.