Jönsson tek over AaFK-skuta

– Vi er svært glade og fornøgde med å ha fått ein kapasitet som Jan Jönsson som ny hovudtrenar i AaFK.

Det seier AaFK sin klubbdirektør, Henrik Hoff, til NRK.no.

– Han er den typen trenar vi har ønskja oss inn i teamet vårt.

– Vi har trur på at han kan vidareutvikle trenarteamet og laget vårt. Vi har tru på spelargruppa, og vi trur Jan Jönsson er den rette mannen til å leie arbeidet framover.

Mange vurdert

Både Åge Hareide og Conny Karlsson, samt tidlegare assistenttrenar i AaFK Kent Bergersen, har alle blitt nemnt i trenarjakta for dei oransje og blå.

No er det derimot klart at tidlegare Rosenborg-trenar Jan Jönsson tek over som hovudtrenar i Aalesunds FK.

– Då Aalesund først tok kontakt var eg nok litt tvilande. I juletidene hadde eg nok tenkt å takke nei, men eg fekk nokre veker på meg til å tenkje meg om, seier den nytilsette AaFK-trenaren til Sunnmørsposten.

Han har skrive under på ein eittårskontrakt, med intensjon om to års forlenging, fortel Hoff.

• Les også: Jönsson AaFK-klar fredag?
• Les også: – Ingen ny AaFK-trenar i år

Ser ikkje på seg sjølve som andreval

Trenaravgjersla blei teken måndag kveld. Tidlegare har Hoff sagt at ein trenar som ser på AaFK som andreval er uaktuell.

– AaFK har overhovudet ikkje blitt andrevalet. Vi har kommunisert tett med Jan Jönsson. Vi veit at han har hatt ein dialog med Vålerenga, men vi oppfattar oss som ein klubb han svært gjerne vil trene, seier Hoff til NRK.no.

Hoff fortel at Jönsson i augneblinken er i Sverige.

– Eg har prata med han på telefon fleire gonger.

– Han kjem til treningsleiren ganske snart, anten på onsdag eller torsdag. Det blir avklara i morgon.

– Kent var den første som blei informert

Dei siste dagane har det vore klart at anten Jönsson eller assistenttrenar i AaFK Kent Bergersen ville bli ny hovudtrenar.

– Kva tenkjer Bergersen, som har blitt heldt litt på pinebenken, om avgjersla?

– Kent Bergersen var den første som blei informert om valet som er gjort. Han har kontrakt som assistenttrenar og skal vere ein del av teamet i 2013, seier Hoff.

Klubbdirektøren forstår at Bergersen nok helst ville bli hovudtrenar.

– Men eg trur han også blir fornøgd med dette valet etter kvart.

Uansett meiner Hoff at det er litt godt å vere ferdig med trenarjakta.

– Når ein får plukka ned ballar som dette, så gjer det godt. Det blir mykje mediefokus når ein leitar etter trenarar, og det er ikkje alltid lett å jobbe under det presset. Då er det desto kjekkare når ein lukkast, meiner Henrik Hoff.

Saka held fram under bildet.

To bronsemedaljar ikkje nok

2012 var eit turbulent år for den nye AaFK-trenaren.

Han blei tilsett i Rosenborg i 2011, med høge forventningar både i år nummer éin og i den påfølgjande andresesongen.

Då Molde tok sitt andre seriegull på rad, tok Rosenborg si andre bronsemedalje på to år.

Det var ikkje godt nok for kravstore og nostalgiske trønderar.

• Les også: Jönsson ferdig i Rosenborg

Storsuksess i Bærum

Før dei to åra i Rosenborg var «Janne» Jönsson ein stor del av suksessen til Stabæk.

Han tok over Bærumsklubben i 2005.

Same år leia han dei til opprykk frå 1. divisjon. I 2007 enda det i sølv, før Jönsson leia Stabæk til klubben sitt første seriegull noko sinne i 2008.

I 2009 blei det klubben si tredje bronsemedalje i historia, medan det i 2010 blei ein skuffande 12. plass.

Forandring frydar?

Dei siste åra har AaFK hatt fritalande og lett brautande Kjetil Rekdal som hovudtrenar. Høgt og lågt, alltid, noko som enda i AaFK til slutt sparka han.

• Les også: Rekdal ferdig i AaFK
• Les også: Spillere så sparkingen av Rekdal på nyhetene

No tek lavmælte og rolege Jönsson over. Sjølv om sesongen 2012 var langt frå optimal for AaFK, har Rekdal resultat.

Han berga klubben frå nedrykk i 2008, før han leia klubben til tidenes første triumf med cupgull i 2009.

I 2010 tok han AaFK til 4. plass i Tippeligaen, noko som er klubben si beste plassering så langt i historia.

I 2011 blei det ny cuptriumf, då Brann blei slått i finalen.

To cuptriumfar var derimot ikkje nok for AaFK, som lenge har håpt å kjempe seg nærmare medaljane. Det blir Jan Jönsson si oppgåve i åra som kjem, medan Rekdal mest sannsynleg blir Vålerenga-trenar.

• Les også: Kun formaliteter gjenstår - Rekdal klar for VIF i morgen