– Vi er ikkje nøgde. Vi var bra før pause, men ikkje i andre omgang. Då blir det for mykje feilpasningar, og vi skaper ikkje stort. Men vi vinn i ein kamp der sigeren aldri er truga. Tre poeng og mykje å jobbe med, det er vel konklusjonen, sa Vålerenga-trenar Kjetil Rekdal til NRK.

Kampen på eit tynt folkesett Ullevaal stadion var elles nokså ferieprega. Første omgang dominerte Vålerenga stort og leia 2–0 over tabelljumboen. Etter pausen gjorde dei ikkje stort anna enn å kontrollere poenga i hamn.

Christian Grindheim la opp til begge scoringane.

Først spela han gjennom Elias Mar Omarsson som sende ballen hardt i nettet. Og like før pause la han hjørnesparket som Kjetil Wæhler skalla i mål.

– Eg spela bra før pause, men dårlegare i andre. Det kan ha å gjere med at vi endra formasjon, sa Omarsson til NRK. Han laga også to mot Odd i førre runde.

«Sommerdaft»

– Vi får tidleg mål mot oss på dødball etter markeringssvikt. Det har vi slite med lenge, og dei får dermed kampen inn i sitt spor. Etter pause skaper vi ingenting. Det var noko «sommardaft» over dette, seier Lars Bohinen.

– Er det krise i klubben no?

– Nei.

Sandefjord kan som dei andre laga sjå fram til ei helg med fotballferie før haustesesongen tek til.

– No har vi eit stort fjell å kome over i haust, mens sjansen er der. Motivasjonen er iallfall til stades, seier Sandefjord-trenaren.

Sandefjord fekk sin keeper Jakob Busk skadd i første omgang, og måtte setje inn reservekeeper Michael Tørnes frå start i andre omgang. Samstundes la trenar Lars Bohinen over til 3-4-3-formasjon.

Etter pause sank tempoet, og Vålerenga kontrollerte det heile utan at dei sjølve skapte stort. Med Kjetil Wæhler som giganten i forsvaret. Morten Fevang hadde ein gigantsjanse til å redusere, men ballen sneik seg utanfor. Utover det skapte ikkje Sandefjord stort.

Vålerenga gjekk opp på andreplassen, tre poeng bak Rosenborg, som møter Odd i morgon. Stabæk kan skyve Oslo-laget ned til tredjeplass i morgon. Sandefjord er framleis desidert sist, seks poeng unna trygg grunn.