Det stadfestar klubbdirektør Henrik Hoff til NRK. Aalesund er dermed den fjerde klubben som må levere informasjon til skattemyndigheitene om avtalar med estiske spelarar.

Tysdag var to av Skatt Østs revisorar på plass i Ålesund for å få opplysingar om avtalane med Enar Jäager og Sander Post.

– Vi var førebudde på at dette kunne skje. Skatt Øst har i dag bedt om kopi av kontraktar i overgangssakene, samt styrepapir og revisorkommentarar, seier Hoff til NRK.no.

Også Bodø/Glimt blir granska

Etterforskinga skjer i lys av at skattemyndigheitene i førre månad opna for å granske fleire norske klubbar for skattejuks i kjølvatnet av Raio Piiroja-saka i Fredrikstad Fotballklubb.

Piiroja er mistenkt for å skjule løn frå Fredrikstad gjennom eit estisk agentselskap for å unngå å betale skatt.

– Vi ønskjer å kontrollere klubbane som har brukt same agent som Piiroja. Spørsmålet er om det er gjort overføringar til spelarar i Norge utan at det er skatta for, seier leiar for skattekrimavdelinga i Skatt Øst, Jan Egil Kristiansen.

• LES MEIR: Skatt øst fortsetter å granske lønna til Piiroja

Måndag fortalte Bodø/Glimt til NRK.no at også dei er under etterforsking for avtalane med keeper Pavel Londak og forsvarsspelar Ale Bärengrub som var i stallen til januar 2011.

Også Hønefoss blir granska for avtalen med estiske Aleksandr Dmitrijev som spelte i klubben frå 2008 til 2010.

• LES OGSÅ: Det er ikke bare Fredrikstad som opplever interesse fra skattemyndighetene

– Kor omfattande ser du saka som no, når de granskar heile fire klubbar?

– Dette er jo klubbar over heile landet. Vi veit jo ikkje om det har blitt gjort noko gale. Foreløpig undersøker vi kva som har skjedd, og om dette har skjedd i samband med Piiroja-saken. Men vi kan ikkje konkludere med noko før granskinga er ferdig, seier Kristiansen i Skatt Øst.

Hoff: – Det har ikkje blitt betalt unormale beløp

Direktør Hoff i Aalesund fortel at klubben brukte Raio Piiojas estiske agent i selskapet Sport & Net Grupp for å hente Jääger frå Torpedo Moskva i 2007.

Han meiner overgangen føregjekk i tråd med lovverket, og at all løn Jääger har fått av klubben har blitt skatta for.

– Er du uroa over at avtalen no er under etterforsking?

– Overhovudet ikkje. Det er fordi vi har reine spelarkontraktar og ein rein agentavtale. Då Jääger kom til oss var han ein av dei best betalte spelarane frå dag ein. Det er ikkje betalt nokre unormale beløp, og vi meiner at dette er ein normal overgangsavtale, seier Hoff og siktar til Piirojas fornya avtale med Fredrikstad i 2007, som er bakgrunnen for skattemyndigheitenes etterforsking (sjekk faktaboks).

– Kva løn har Jääger fått?

– Det vil eg ikkje kommentere. Vi har gitt Skatt Øst det dei treng av informasjon, seier Hoff.