John Carew har vore klubblaus sidan han forlot den noverande Premier League-laget West Ham i mai denne våren.

Dei siste dagane har spanske medier meldt at Carew skal vere aktuell for fleire spanske klubbar.

Sist ut i rekka er altså avisa Deporte Valenciano, som følgjer Primera División-klubben Levante tett.

– Klubben er ute etter ein spiss som Carew

Ifølgje Deporte Valenciano skal Carew sjølv ha tilbydt Levante sine tenester for 15.000 euro (ca. 110.000 norske kroner) i månaden fram til januar 2013.

– Det er kjent at Levante er ute etter ein spiss, og då helst ein stor og sterk type som Carew. Ein slik spelar har dei jakta sidan juni, seier La Liga-ekspert Petter Veland.

– Kor truverdig er dette?

– Det er vanskeleg å seie. Spanske aviser treff på nokre rykte, men bommar på desto fleire. At Carew har komme såpass langt med Levante skal ein ta med ei klype salt, seier Veland.

Taus Flod

Så seint som i slutten av august var John Carew aktuell for ein retur til norsk fotball. Då var Vålerenga på banen, og forhandla om ein kontrakt med spissen, ifølgje VG.

Avisa skreiv også at Carew ville ha seks millionar kroner for å spele ti kampar for klubben. Det gjekk ikkje Vålerenga med på.

– Alt dette er bare spekulasjonar. Viss det var aktuelt for John å spele for VIF, ville det definitivt ikkje vore på grunn av pengar, sa Carews rådgjevar Per Arne Flod til VG.

Flod vil ikkje kommentere ryktene rundt ein overgang til spanske Levante overfor NRK.no.

– Det vil eg ikkje kommentere. Eg svarar aldri på noko før det er klart, seier Flod, som sist var i møte med Carew onsdag denne veka.

Levante avslutta førre sesong på 6. plass i Primera División.

VIDEO FRÅ ARKIVET: Carew på klubbjakt