– Eg fekk kontrabeskjed her om dagen. Plutseleg hadde dei funne plass til meg likevel, seier Karoline Bjerkeli Grøvdal.
25-åringen har vist gode takter denne sesongen og er ei av få som allereie er kvalifisert til VM i Beijing. Likevel blei ho fyrst ikkje funne verdig ein plass i startfeltet under Diamond League-stemnet i Paris i morgon.
Ville berre ha europeiske løparar
Forklaringa ho fekk frå arrangørane var enkel. Grøvdal fekk ikkje plass i feltet fordi ho var europeisk.
LYSPUNKT: Under lag-EM i Tsjeboksary i Russland var Grøvdal det store lyspunktet. Med tida 4.16,22 sprang ho inn til andreplass.
Foto: Thore-Erik Thoresen– Eg fekk beskjed at dei ikkje skulle ha europeiske løparar i det heile tatt på 5000 meter. Det var litt rart og vanskeleg å forstå når det er faktisk er Diamond League i Paris.
NRKs friidrettsekspert Vebjørn Rodal synest avslaget var spesielt.
– Det høyrest veldig rart ut. Diamond League-stemnet i Paris brukar å vere opptekne av å ha europeiske løparar på startstreken.
– Men i år trur eg dette 5000 meter feltet er lagt opp til at etiopiske Almaz Ayana skal kunne gå for verdsrekord. Difor kan det vere at feltet er fullbooka for lengst og at det er difor Karoline har fått beskjed om at ho ikkje har fått plass, sa Rodal då han høyrte om situasjonen førre veke.
LES SAKA: Grøvdal norsk lyspunkt
Går for ny pers
Heldigvis er situasjonen no snudd. I løpet av dagen reiser Noregs beste langdistanseløpar dei siste sesongane til Paris og er klar på startstreken i det NRK-sendte stemnet i morgon kveld. Eit løp som passar perfekt i VM-oppkøyringa.
– Det er eit stemne som mange løparar har lyst til å springe. For meg passar det veldig fint å springe i Paris, seier Grøvdal som har lagt bak seg ein god treningsperiode og er ved godt mot dagen før møtet med verdsstjernene.
– Oppladninga har vore bra og eg har ambisjonar om å kjempe om ny pers.
Persen på 15.15,18 sat ho under Bislett Games.
LES SAKA: VM-klar med krefter igjen
