– Åh, det er så herleg. Skikkeleg artig. Eg var så gira i dag, seier Olafsen til NRK.no.
Den norske jenta fekk ein god start i finalen og låg som nummer to tidleg i løpet, men falt etter kvart til 3.-plass.
Den heldt ho til mål i den korte traseen i Aspen. Vann gjorde amerikanske Lindsey Jacobellis, medan Eva Samkova frå Tsjekkia tok 2.-plassen.
- Sjå intervju med Helene Olafsen nedst i saka.
– Digg at eg gjer mykje rett
– Det er kjekt å kjenna at beina er med, at eg kan køyra raskt og at startane mine er betre. Det har eg jobba mykje med, seier jenta frå Oppegård og legg til:
– Digg at eg gjer mykje rett, det lovar godt.
23-åringen har slite mykje med skadar dei siste åra, men no verkar Olafsen å vera attende. Dette var hennar tredje pallplass denne sesongen.
– Det er nesten som eit lite comeback å rekna for Helene, kommenterte Thomas Lerdahl og Tom Hovde.
Dette var den fyrste X Games-medaljen til Olafsen på fem år.
– Medalje var viktig. Eg har to sølv frå før. Ikkje gull eller bronse, så det passa godt med bronse i dag.
– Kva gjer du fram mot OL?
– Eg skal berre ha det kjekt, jobba med hovudet og slappa av. No skal eg ha det artig saman med folk og vener. Så vert det OL – der kan eg lova eit endå betre show!
Veteransiger på herresida
Stian Sivertzen klarte ikkje hamla opp med det sterke heatet i herrefinalen. Nordmannen var sist ut av gaten og klarte aldri å ta igjen forspranget og vart nummer seks.
– Me hadde nok forhåpningar om medaljar, men me skal ikkje klaga, konkluderte Lerdahl og Hovde.
Amerikanske Nate Holland tok sin sjuande siger i X Games.
– Utruleg imponerande at han klarar å stå i mot presset, sa Lerdahl.
Holland låg som nummer fem før siste sving, men køyrde seg altså heilt til topps.
Alex Tuttle sikra dobbelt amerikansk, medan tyske Konstantin Schad tok 3.-plass.
Sivertzen ligg på 3.-plass i verdscupen.