Boasson Hagen, som fredag skreiv kontrakt med Team Dimension Data ut 2018, venta på tilbod frå Thor Hushovd, men høyrte aldri noko frå den tidlegare VM-vinnaren.
No fryktar han at Hushovds profflag ikkje blir noko av frå neste sesong.
– Eg føler ikkje at han har veldig god tid, seier Boasson Hagen til NRK.
– Eg skal ikkje seie at det ikkje blir noko lag, men det burde ha vore meir konkret når vi er så langt ute i sesongen, legg Boasson Hagen.
Hushovd: – Kan danne lag med utanlandske profilar
Hushovd lanserte i fjor store planar om eit norsk profflag frå 2017-sesongen. Både Edvald Boasson Hagen og Alexander Kristoff var øvst på ønskelista over ryttarar som skulle sykle for laget.
No er Boasson Hagen uaktuell for dei to neste åra. Kristoff har kontrakt med Katusha i minst eitt år til.
Men Hushovd trur ikkje Boasson Hagens kontraktforlenging betyr kroken på døra for profflag-satsinga.
– Eg hadde sjølvsagt som mål å få dei beste norske sykkelryttarane. Edvald var på ønskelista, men hans kontraktforlenging med Dimension Data har ikkje så mykje å seie for ei potensiell satsing, fortel Thor Hushovd til NRK.
– Får eg ein internasjonal sponsor eller ein norsk sponsor som skal vere stor i utlandet så er det mindre attraktivt med norske ryttarar på laget. Det er ikkje sjølvsagt at det bare skal vere norske ryttarar dersom eg får ein sponsor på plass, seier Hushovd.
– Dialog med utanlandske sponsorar
38-åringen har enno ikkje gitt opp å få på plass eit World Tour-lag frå neste sesong, sjølv om han enno manglar ein stor sponsor.
– Eg jobbar med aktørar som har lyst, men som har gått langt over tidsfristen eg sette i utgangspunktet. Men dialogen har pågått så lenge at eg har lyst til å gje dette ein siste sjanse, seier Hushovd.
Han fortel at han har vore i kontakt med sponsorar frå andre land, men vil ikkje seie noko om dei har sagt nei til å vere med på ei satsing.
– Det har både vore internasjonale aktørar og norske selskap på banen. Foredelen i sykkel er at dei samarbeidspartnarane som har lyst inn i sporten kan påverke kor ryttarar skal komme frå, seier Hushovd.
Men i jobben med å danne eit lag med Edvald Boasson Hagen og Alexander Kristoff som spydspissar er toget gått for denne gang.
– Han må først ha eit lag før han kan gje tilbod, seier Boasson Hagen, som held døra open for å bli del av eit norsk profflag ein gang i framtida.