«Kongen» banka unggutta: – Artigare no når det blir sjeldnare for kvar gong

Det var derimot Tarjei Bø, som stod over sprinten laurdag, som lenge var i føringa. På siste skyting blei det heilsprekk med tre bom for eldstebror Bø. Bomme gjorde nær alle andre òg, men 39 år gamle Ole Einar Bjørndalen slo til med fullt hus.

Den einaste som følgde opp like bak var Vetle Sjåstad Christiansen. 21-åringen gjekk ut om lag tre sekund bak Bjørndalen.

Bak følgde eit koppel av nordmenn, men i den siste runden var «kongen» av skiskyting best. Med eit lett lite rykk hoppa han nokre meter framfor Sjåstad Christiansen, og gjekk åleine over målstreken.

Lars Berger og Emil Hegle Svendsen gjekk ein lynrask sisterunde, men Sjåstad Christiansen heldt unna og tok andreplassen 4,9 sekund bak Bjørndalen.

Berger spurta frå Hegle Svendsen og tok tredjeplassen 6,7 sekund bak.

• Les også: Bjørndalen: – Jeg burde slått Emil i dag

Saka held fram under videoen.

Måtte hente inn forsprang

Laurdag skaut Bjørndalen feilfritt, men blei slått av ein lynrask Hegle Svendsen.

– Eg burde tatt Emil i dag, men han går fort og var på hogget. Eg får prøve igjen i morgon, konkluderte 39-åringen i prat med NRK laurdag.

Etter sigeren søndag fortel superveteranen at han var heilt daud og ikkje hadde noko å gå med dagen før.

– I dag hadde eg ein heilt annan energi. Eg gjekk billeg heile vegen og kunne svare på rykka.

Det starta derimot tøft for Bjørndalen som blei liggande bak etter éin bom på første skyting.

– Bommen gjorde at eg måtte køyre hardt for å ta inn forspranget. Det blei langt fram, men løypa her gjer at det er mogleg å køyre inn, sa Bjørndalen til NRK etter løpet.

Ekstra kjekt som veteran

Utover i konkurransen var derimot 39-åringen solid på både standplass og i sporet, og gjekk til slutt i einsam triumf over målstreken.

– Skytinga var veldig bra i dag, sjølv om eg var litt sløv på liggande. Eg er heller ikkje spesielt sliten når eg kjem i mål. Det er litt opp og ned, og no håper eg dette held ei god stund, sa Bjørndalen.

– Er det like moro å vinne no som i starten av karrieren?, fekk Bjørndalen spørsmål om.

– Det er meir artig no når det blir sjeldnare for kvar gong, flira søndagens sigersherre.

Saka held fram under videoen.

Sikra tredjeplass etter monsteravslutning

Det var sju nordmenn blant dei 10 beste på fellesstarten. Norske utøvarar tok også dei fire øvste plassane. Litt overraskande var det Lars Berger som sklei inn til tredjeplass.

– Det artigaste var å skyte null på siste. Då får eg eit kick som varer heile sisterunden, sa Berger etter tredjeplassen.

Han bomma fire gonger, men eit monster av ei sisterunde gjorde at han nesten tok igjen både Sjåstad Christiansen og Bjørndalen.

– Eg hadde først ei gruppe rett framfor meg, så det var inspirerande å ta innpå. Det var ikkje så knallhardt.

Berger står utanfor landslaget denne sesongen , og gjekk i blå drakt på Sjusjøen. No håper han på oppløftande meldingar frå landslagsleiinga.

– Eg håper å få telefonen i kveld, og så får vi sjå kva dei seier. Men eg fryktar det verste, fortalde Berger.

Landslagstrenar Espen Nordby Andersen var ordknapp:

– Det er veldig hyggeleg at både Lars og Aleksander (Os) er «back in business». Vi må setje oss ned og få kabalen til å gå opp, men vi har ikkje noko svar no.

NB! Fjorårsvinnaren i verdscupen, Martin Fourcade, hadde ein forferdeleg dag på fellesstarten. Før den tredje skytinga mista han magasinet og måtte lade éin og éin patron. Sjølve skytinga var også dårleg, ifølgje NRK-ekspert Ola Lunde. På veg ut av matta snudde franskmannen seg og såg oppgitt på trenaren. Etter tredje skyting låg han 1,59 minutt bak teten, og før fjerde skyting braut franskmannen.

Saka held fram under videoen.

Resultat fellesstart søndag:

1) Ole Einar Bjørndalen, Noreg 38.36,3 (2)
2) Vetle Sjåstad Christiansen, Noreg 0.04,9 (2)
3) Lars Berger, Noreg 0.06,7 (4)
4) Emil Hegle Svendsen, Noreg 0.07,0 (3)
5) Arnd Peiffer, Tyskland 0.12,3 (2)
6) Simon Desthieux, Frankrike 0.15,4 (3)
7) Johannes Thingnes Bø, Noreg 0.18,0 (3)
8) Lars Helge Birkeland, Noreg 0.19,9 (3)
9) Erlend Øvereng Bjøntegaard, Noreg 0.25,3 (3)
10) Florian Graf, Tyskland 0.27,6 (3).