– Eg kjenner meg ikkje akkurat som ein toppidrettsutøvar når det begynner å bli tungt å ta på sokkar og sko, seier Marit Bjørgen med eit smil.
Ho er sju månader på veg og er i motsetning til alle utøvarane rundt på Skiforbundets vinter-kickoff ikkje smånervøs med rundt ein månad igjen til sesongstart.
Håpar å trene heilt til fødselen
Men med ei veke som framleis inneheld 15 treningstimar er Bjørgen framleis langt meir toppidrettsutøvar enn folk flest. Også nå har 35-åringen intervalløkter kvar veke.
– Eg er jo frisk og fin. Det er ikkje vits å legge seg på sofaen så lenge ein føler seg fin og i god nok form til å trene, seier Bjørgen.
Og slik kjem det til å fortsette ei god stund til. I slutten av desember er terminen for Bjørgen og sambuar Fred Børre Lundbergs fyrste barn og den vordande mor ser ikkje for seg å kutte ut treninga før fødselen.
– Rart å sjå jentene reise
– Noko målsetning for kor lenge eg skal trene har eg ikkje. Det trur eg er viktig. Men eg har snakka med fleire som har trent den dagen dei fødde. Det viktigaste er å lytte til kroppen og ta signala som kjem. Det skjer jo store endringar med kroppen, og det på ein hyggeleg måte når det veks ein liten gut der inne.
– Er namnet bestemt?
– Nei, det har me ikkje klart å bestemme oss for ennå, smiler Bjørgen som skryter av oppfylginga ho får frå Olympiatoppen.
– Den er veldig god, eg får meir oppfylging enn i eit normalt svangerskap, blant anna fleire ultralydar for å sjekke at alt er bra.
Og det har heldigvis ting vore til no. Bjørgen har delteke på alle landslagets samlingar i sommar og haust. Men når lagvenninnene reiser til Val Senales for å trene på breen der til veka, er det utan skidronninga sjølv.
– Må jo seie det er rart når dei reiser til Val Senales utan meg. Men eg gler meg til å fylgje jentene til vinteren så får me sjå om det kriblar eller ikkje, smiler verdas beste langrennsløpar – nå kanskje også verdas best trente gravide idrettsutøvar.