Etter fire kampar i 2013-sesongen stod Aalesund med 12 av 12 moglege poeng. I år har ikkje sunnmørslaget vunne enno.
– Vi har venta på årets første siger i nokre kampar, og håpte på den i dag. Det håpte sikker alle på stadion her òg. Det er berre å beklage, det er ikkje bra nok det vi leverer, sa Jonatan Tollås Nation til NRK etter tap mot Start.
Zlatco Tripic sende Start i føringa, før Ernest Asante dobla til 0–2. Daniel Arnefjord reduserte like før slutt, men det blei verken siger eller poeng for Aalesund.
Medan Start no er oppe i sju poeng, slit AaFK i botnen av tabellen med to poeng.
– Eg føler vi fekk dårleg betalt i dei to første, men i dei to siste kampane har vi vore langt under par. Hadde vi visst kva som var grunnen kunne vi gjort noko med det, sa AaFK-kaptein Tollås Nation.
Etterlengta første scoring
Heimelaget opna derimot godt på Color Line Stadion. Men etter fleire halvsjansar og moglegheiter var det Start som tok leiinga – etter 38 minutt.
Zlatko Tripic fekk ballen på 17 meter, og via AaFK-kaptein Jonatan Tollås Nation gjekk ballen i ein boge over Sten Grytebust og i mål til 0–1.
– Vi har sleppt inn mål første i dei andre kampane og var einige om å score det første målet no!, fortalde Tripic til NRK etter kampen.
Spelaren, som gjekk frå Molde til Start i vinter, synest i tillegg det var svært godt å sjølv stå bak scoringa.
– Eg har venta ei stund. Eg scora i treningskamp før sesongen og har kome til sjansar, men det var veldig gøy. Eg er godt fornøgd med målet, konkluderte han.
Tredje for sesongen
Heimelaget heldt på ballen og køyrde store delar av første omgang, men Start fekk scoringa. I andre omgang var det igjen bortelaget som var effektive.
Etter 59 minutt kom 0–2. Fredrik Ulvestad rota vekk ballen på eigen banehalvdel, og Espen Hoff fann Ernest Asante. Åleine med Grytebust trilla Start-angriparen ballen enkelt i mål.
Scoringa var Asante si tredje for sesongen.
– Første halvdel av første omgang er bra, før vi fell mot slutten. Andre omgang er utruleg rufsete. Vi blir for opptekne av å få ballen framover, får brot imot oss og blir straffa, meinte Tollås Nation.
– Sjølvtilliten er ikkje på topp
Like etter 0-2-scoringa sette AaFK innpå Tor Hogne Aarøy. Dei måtte ha redusering og lempa ballar oppover og inn på bortelaget sin halvdel.
Start kom til store moglegheiter på overgangar, men etter 89 minutt var det reduseringa som kom.
Eit frispark blei slått fint av Michael Barrantes og i feltet heada Daniel Arnefjord inn 1–2.
– Det er kult å score, men det betyr ingenting når vi taper. Vi står med to poeng etter fire, så sjølvtilliten er ikkje på topp, fortalde Arnefjord til NRK.
Etter scoringa blei det både ampert og eit enormt press mot Start-målet, men sørlendingane heldt unna og sikra sin andre siger på fire kampar.
Mjelde ser oppover
Når Start i tillegg har spelt tre av kampane sine på bortebane, er trenar Mons Ivar Mjelde svært fornøgd med poengfangsten.
– I starten av sesongen er det viktig med jamt med poeng, og sju poeng er bra. Spesielt med vanskeleg bortekampar.
– Eg håper spelarane hentar ut meir inspirasjon. Vi går inn i ein periode med mange kampar, og det er viktig å vere nøye på detaljane. Som lag har vi tatt nokre steg, vi er i utvikling og det gler meg, sa Mjelde til NRK.
2-1-siger over AaFK meiner han var fortent, samstundes som han lenge trudde det ville bli 1–0.
– Vi er heldige som ikkje får ei scoring i sekken bak, men vi vaks oss sterkare og gjer ein veldig sterk bortekamp. Vi står distansen og tør å eige ballen trass i at vi er på Color Line Stadion.
Den tidlegare Brann-trenaren har fått tillit i sørlandsklubben på fjerde året. Når det i tillegg er kontinuitet i spelargruppa ser Mjelde lyst på framtida.
– Kontinuitet er viktig på både spelar- og trenarsida. Vårt mål er å utvikle oss vidare, og klarer vi å vere blant dei åtte øvste er det bra med føresetnadene. Men vi kjem gjerne endå høgare, avslutta Mjelde.