– Stakkars lærarar som skal rette heimelekser, gi heimelekser og rette heimelekser. Eg vil at lærarane skal bruke meir tid på å førebu timen, heller enn å rette lekser, seier Mørland til NRK.
– Når eg snakkar med lærarar er dei samde. Når eg snakkar med foreldre er dei samde. Dei spør kvifor det ikkje er gjort tidlegare, seier KrF-politikaren.
Dårlegare i matte
Tysdag vart dei nye Pisa-tala lagt fram. Tala viser ein overraskande nedgang i matematikkresultata. Faktisk har ikkje norske elvar vore dårlegare i matematikk sidan Norge byrja å Pisa-teste elevane.
Det meiner Venstre-politikar Øystein Haga er ei viktig årsak til å ikkje kutte leksene. Han har jobba som lærar i den vidaregåande skulen i 40 år.
– Eg er tvilande til den retorikken. Dette har eg høyrt fleire gonger tidlegare. Leksearbeid er ein viktig del av den vidaregåande skulen. Då tykkjer eg overgangen frå grunnskule til vidaregåande skule er problematisk dersom ein ikkje øver eller brukar lekser som ein læringsprosess i grunnskulen, seier Haga.
Knut Mørland (KrF) hevdar at han har med seg både lærar og foreldre på at leksene bør fjernast.
Foto: Ludvigsen, Benedicte Goa / NRKVil tenkje nytt
Mørland meiner det er på tide å tenkje nytt i den norske skulen.
– Vi har hatt lekser dei siste hundre åra. Det har vore lekser, lekser og lekser. Eg prøver å få med meg politikarane til å tenkje nytt, seier han.
Øystein Haga (V) har ikkje tru på ein leksefri skule.
Foto: Sundsdal, Svein / NRKKrF-politikaren meiner også at det er mange elevar slit med leksene fordi ikkje alle foreldre er like flinke i til dømes matematikk.
– Har dei dyktige foreldre er det veldig greit. Men eg meiner at dette skal liggje i skuletida, seier han.
– Må tilpasse leksene
Øystein Haga er samd i at det er skilnad i kva foreldre kan hjelpe barna med på heimebane. Likevel meiner han at lekser er viktig.
– Eg trur det er viktig at elevane tidleg lærer seg å jobbe sjølvstendig. Uavhengig av foreldra og at dei prøver å jobbe med leksene og tilpasse leksene med det stoffet dei kan, seier Haga.
– Det er læraren som kan faget og som er pedagogar. Det er dei som skal lære elevane det dei skal lære. Det skal skje i skuletida. Elevane lærer seg å jobbe på skulen akkurat som folk i vanleg arbeid. Ingen har lyst til å ha med seg heimearbeid, seier Mørland.
Øystein Haga har inga tru på at Mørland vil få gjennomslag for leksefri skule i Grimstad.
– Eg trur ikkje det er mogleg. Eg trur det er veldig viktig at ein har eit trykk på lekser. Det kjem ein vidaregåande skule som jobbar systematisk og brukar leksene som eit pedagogisk grep, seier Haga.
