– Eg er oppteken av å følgje reglane, så eg torer nok ikkje å ta på meg drakta. Men eg skal i alle fall ha på meg eit ØIF-skjerf om vi vinn seriegull, seier Godskesen til NRK.
Kjærleiken til eliteserielaget i handball har gjort at ho har strikka ein gensar med klubblogoen. Etterkvart skal ho også brodere inn viktige datoar i klubbhistoria.
– 31. desember då vi vann cupgullet skal sjølvsagt vere med. Så håpar eg å kunne brodere inn seriegullet også, og kanskje namnet til nokre av dei viktigaste spelarane. Til dømes Andre Jørgensen Hofstøl, som eg tykkjer har gjort ein veldig bra jobb for klubben, seier ho.
- Les også: – Dette kjenneteiknar eit vinnarlag
På talarstolen i Brann-drakt
I 2007 gjekk SV-politikar Heikki Holmås på talarstolen i Brann-drakt etter at klubben hadde sikra sitt første seriegull på 44 år.
Godskesen var sjølv på tribuna då ØIF Arendal vann cupgull i Oslo spektrum i desember. Der såg ho klubben sikre sin første tittel nokonsinne.
– Den kjensla då vi forstod at det gjekk mot siger er nesten ubeskriveleg. Det var ein sigersrus og lykkerus for alle. Du må nesten vere der for å forstå det, seier Godskesen.
– Eg er utruleg stolt av ØIF Arendal. Fleire av spelarane har vokse opp saman med mine barn. Det gjer at klubben har blitt trekt meir og meir til hjartet mitt, seier ho.
Frp-politikaren var tilstades i Drammenshallen då arendalittane slo Drammen i førre veke.
– Der strikka eg faktisk den eine armen på gensaren for å få litt ekstra «guts» inn i maskene, ler ho.
- Les også: Sikret seriemedalje etter snuoperasjon
Håpar på ØIF-skjerf i Stortinget
Dersom Bodø tapar borte mot Haslum, samstundes som ØIF slår Stord i neste serierunde, er seriegullet eit faktum.
Sportsleg leiar i ØIF Arendal, Per Carsten Michelsen, er stolt over engasjementet til Godskesen. Han håpar å få sjå ØIF-skjerfet i stortingssalen.
– Det hadde vore stort. Då skal vi følgje tv-sendingane. Det hadde vore ei veldig spesiell oppleving, seier han.
– Eg veit at gutta hadde sett veldig pris på det. Vi tykkjer at det er veldig moro at ho torer å fronte oss på det viset. Ho er ein veldig viktig supportar for oss, seier Michelsen.
- Les også: ØIF-treneren gir seg