– Det blir viktig å komme tilbake på vinnarsporet, men vanskeleg. Skal vi ha sjanse på topp fire bør vi vinne denne kampen, seier sportsleg leiar Peder Langfeldt til NRK.
Vipers ligg på 6. plass på tabellen før kveldens oppgjer i Fredrikstad. Avstanden opp til Oppsal på 4. plass er på fem poeng.
Sportsleg leiar i Vipers Peder Langfeldt.
Foto: Sander Heggheim / NRK– Topp fire-toget kan gå om vi tapar i dag. Men det kan også vere ei lita moglegheit om vi skulle tape. Det viktigaste er uansett å fokusere på å vinne kampen, seier Langfeldt.
- Les også: Næringslivet løftar Vipers mot toppen
Vil revansjere heimetapet
Sørlendingane fekk ein knallstart på 2015 med tre sterke sigarar mot Stabæk, Byåsen og Tertnes.
Sigersrekkja gjorde at Vipers melde seg på i toppkampen i eliteserien.
No står laget med fire strake kampar utan siger. I førre serierunde vart det eitt poeng borte mot Storhamar.
I heimekampen mot Fredrikstad vart det stortap 22–28. Det vil Vipers revansjere i dag.
– Vi gjorde ein dårleg kamp mot dei på heimebane. Vi skal i utgangspunktet vere eit betre lag enn dei. Spelar vi på vårt beste trur eg vi slår dei, seier han.
- Les også: – Vi tar medalje innen tre år
To usikre kort
Fleire spelarar har trøbla med sjukdom og skader før oppgjeret i Fredrikstad. Karin Weigelt og Sanne Bak Pedersen er framleis usikre.
Men Martine Rønning får truleg debuten sin i eliteserien.
– Ho er ein god skyttar, så vi får håpe at ho får brukt styrkane sine og får laga eit par mål frå distanse, seier Langfeldt.
