– Vi har fått melding om at to personar har gått gjennom isen, men begge skal no vere oppe igjen, seier operasjonsleiar i Agder-politiet, Geir Andersen til NRK.
Dei to er sende til sjukehuset i Kristiansand. Den eine med luftambulanse. Den andre med ambulanse.
Begge skal vere bevisst, ifølgje politiet.
Var på tur
22-åringane skal ha vore ein del av eit turfølgje på seks personar. Dei to bestemte seg for å gå rett over vatnet i staden for å gå rundt.
Mennene skal ha gått gjennom isen omtrent midt ute på vatnet, kring 100 meter frå land.
Dei to mennene skal ha blitt redda opp frå vatnet av turkameratane som kom seg ut med ein båt som låg i nærleiken. Dei to skal ha vore i vatnet i meir enn ti minutt.
Sende dykkarar og luftambulanse
Politiet vart varsla om hendinga klokka 17.35. Kring ti minutt seinare melde politiet at dei to var oppe frå vatnet.
Politiet sende både dykkarar, luftambulanse og brannvesen til staden.
Berre kring halvparten av vatnet er islagt.
