– Vi har sendt ein førespurnad til klubben om at vi gjerne vil ha dei med på trening. No skal trenarane i dei to klubbane diskutere når det blir, seier Start-direktør Even Øgrey Brandsdal til NRK.
Vindbjart-duoen dominerte då Vindbjart slo Start ut av cupen tidlegare i år.
Ser stort potensial
– Vi hadde ikkje invitert dei dersom vi ikkje såg at dei har potensial til å bli eliteseriespelarar, seier Øgrey Brandsdal.
Midtbanespelar Thomas Zernichow har allereie prøvespelt i Odd. No får han også sjansen til å vise seg fram for Start.
– Det er veldig spennande. Det er kjekt å få prøve seg på eit høgare nivå enn 2. divisjon. Eg har absolutt ambisjonar om å spele på eit høgare nivå, seier han.
Daniel Aase har tidlegare spelt i eliteserieklubben. No kan han vere på veg tilbake.
– Eg vil ikkje seie så mykje meir enn at eg veit at det har vore kontakt mellom klubbane, seier Aase.
– Eliteseriespel freistar
Zernichow har stor tru på at han er god nok til å spele på toppnivå i Norge.
– Eg trur på eigne ferdigheiter og at eg med litt tid kan tilpasse meg eliteserienivå om eg får sjansen, seier han.
– Klarer du å seie nei om du får eit tilbod?
– Det er mykje som skal klaffe. Klubbane må mellom anna bli einige. Men det er sjølvsagt veldig freistande å spele i eliteserien, seier han.