Sjekk ut Jerv sin imponerande statistikk

– Vi er stinne av sjølvtillit etter to sterke sigrar mot Bryne og Hønefoss, seier Omoijuanfo til NRK.

Spelarane i 1. divisjonsklubben har god grunn til å gå med heva hovud. På dei siste 22 seriekampane har laget altså berre tapt to kampar.

Då er dei siste 13 kampane i fjorårets 2. divisjonskamp medrekna.

• Les også: Jerv-kaptein: – Grasmatta er ein skam

– Jobbar hardt for kvarandre

Før laget tapte mot Follo i 2. serierunde denne sesongen må vi heilt tilbake til august i fjor for å finne sist laget tapte ein seriekamp. Då tapte sørlendingane 3-4 mot Ørn-Horten etter å ha leia 3-0.

– Det er klart at denne statistikken er veldig bra. Det viser at vi er eit godt defensivt lag. Vi heldt tett bakover og jobbar hardt for kvarandre, seier Jerv-spissen.

I førre serierunde scora han sitt første seriemål for Jerv då dei slo Hønefoss på heimebane. I måndagens oppgjer mot Ranheim i Trondheim ventar han tøff motstand.

– Dei har hatt ein tung start på sesongen og treng poeng for ikkje å ha hamne heilt i botnen, seier Omoijuanfo.

• Les også: Ellevill jubel då Jerv tok sin andre siger

Offensivt fokus

– Den siste veka har vi hatt mykje fokus på det offensive spelet vårt. Eg trur Ranheim kjem til å ligge lågt. Vi er vande med å styre kampane og satsar på å gjere det i kveld også, seier han.

Det er over ei veke sidan sist seriekamp. Spissen vedgår at det var godt med ein liten kamppause etter eit tøft kampprogram i mai.

– Men no har alle gutta fyrt seg opp igjen og er klare til å ta heim tre poeng, seier han.

På dei siste 22 kampane har Jerv altså kun tapt to kampar. Dei har spelt uavgjort elleve gonger og vunne ni kampar.