– Alle skadane gjer meg uroleg før seriestart. Det stressar meg litt å sjå kven som blir klar til onsdagens seriepremiere, seier ØIF-trenar Marinko Kurtovic.
Førre sesong vann ØIF Arendal både serie og cup. Men i sluttspelet var det takk og farvel i kvartfinalen.
Dermed vart det ein rekordtidleg start på oppkøyringa. Klubben har trena meir og hardare enn nokon gong.
Skal analysere treningsarbeidet
– Vi skal setje oss ned og gjere ei grundig analyse av opplegget vi har vore gjennom. Vi må sjå om vi kan endre på noko slik at vi unngår dette i framtida. Det er ikkje ideelt med seriestart berre få dagar unna, seier sportsleg leiar Per Carsten Michelsen.
Strekkskadar går att hos fleire spelarar.
– Det kan vere tilfeldig. Vi trur det er fleire ting, men vi må lære av dette og sørge for at vi ikkje stiller oss i denne situasjonen igjen, seier Michelsen.
Den regjerande seriemeisteren har framleis ikkje sleppt opp på treninga for å spisse forma inn mot seriestart.
Årsaka til det er at klubben skal ut i kvalifisering til europacupen i oktober.
Toppar forma til europacupkvalifisering
Denne helga er ØIF med i ei treningsturnering i Follo. Det betyr mange kampar på få dagar. Det kan bety tunge bein i seriepremieren på heimebane onsdag.
– Det er ein plan vi har. Vi veit vi vil ha litt tyngre bein, men eg er ikkje uroa for det. Så lenge attityden er der, så kjem vi til å gjere det bra. Vi skal vere best når kvalifiseringa til europacupen startar, seier Kurtovic.
– Dette er ikkje ideelt med tanke på seriestart og vi kjem nok litt tregare i gong enn i fjor. Men europacupen er noko vi satsar tøft på og vi vel difor å køyre på med meir kamptrening, seier Michelsen.
Her er skadelista:
- Josip Vidovic: Fekk ei lilletå ut av ledd i ein treningskamp fredag. Spelte likevel kamp i helga og er truleg klar til seriestart.
- David Svenningsen: Slit med ein strekkskade, men rekk truleg seriestart. Var ute nesten heile fjorårssesongen på grunn av korsbandskade.
- Lars Jakobsen: Den nyinnkjøpte bakspelaren slit med ein strekkskade, men kan rekke seriestart.
- Robert Markotic: Har fått strekk. Er truleg med i kamptroppen mot Stord. Supporterane samla inn pengar i vår for å hente høgrebacken til Arendal.
- Einar Ingi Hrafnsson: Mista heile fjorårssesongen på grunn av ei skulderskade. Er ikkje hundre prosent klar.
- Sondre Paulsen: Pådrog seg ei alvorleg skade i brystmuskelen under ei styrkeøkt i sommar. Rekk ikkje seriestart.
- Sander Simonsen: Slit med beinhinnebetennelse, men er truleg med i troppen mot Stord onsdag.
- David Rui: Slit med ein strekkskade. Usikker til seriestart.
- Kenny Ekman: Pådrog seg ein kneskade på treningssamling i sommar. Rekk ikkje seriestart.