– Etter mi meining er dette ei skam, sa ein av politimennene som henta 22-åringen frå ei leilegheit i Mandal natt til tysdag.
NRK har vore i kontakt med politimannen onsdag. Han vil ikkje la seg intervjue, men seier at han står ved kommentaren om at utsendinga var ei skam.
- Les også: Muradi: – Kan berre håpe
– Ubehageleg
Politimannen seier at det var eit ubehageleg oppdrag fordi han måtte påføre tolken ei vonde ut ifrå ei avgjerd han meiner er feil.
Han understrekar samstundes at han ikkje kjenner dokumenta i saka.
På Twitter får politimannen støtte frå mange. «Dagens helt» og «godt sagt» er nokre av kommentarane.
Tidlegare justisminister Anne Holt er ein av dei som støttar politimannen.
– Tøff politimann i utkastingssak på Dagsrevyen, skreiv Holt.
- Les også: Solberg snur: Ber om ny vurdering for tolk Politiets Fellesforbund
Politiets Fellesforbund: – Ein glipp
Informasjonsrådgjevar Gry Jorunn Holen i Politiets Fellesforbund seier at politifolk ikkje bør ytre seg personleg i saker.
– For oss er det ein glipp at han seier kva han meiner i saka. Men politifolk er også menneske i saker, og slike gleppar skjer, seier Holen til NRK.
Politimannen let mellom anna venen til Muradi sitje på i politibilen til Kristiansand lufthavn Kjevik.
I eit intervju med NRK etter pågripinga gav Muradi skryt til dei to politimennene som henta han.
– Dei var veldig venlege mot meg og gjorde berre jobben sin, seier han.