– Vi har ein kar her borte som ikkje har alt i orden. Det er vel ein rumensk bil, seier køyretykontrollør Thor Inge Kostøl til NRK.
Saman med to kollegaer og to politimenn kontrollerer han alle vogntoga som kjem i land med danskeferja i Kristiansand. Det er iskald vind og snøen lavar ned.
Kom med sommardekk
Denne gangen er det 20 vogntog som er med båten. Vogntoga stiller seg i kø og må vente i tur og orden på å bli kontrollerte.
– Det verste vi ser er reine sommar dekk. Dette er eit sommardekk, seier Kostøl og peikar på eitt av dekka på eitt av vogntoga.
– Han har lov til å køyre med dette etter lova, men så er det slik at du skal sko deg etter forholda. Slik forholda er no, så er det vinterdekk som gjeld. Vi må sjå om vi kan finne på noko eller om han må vente til vegen er svart igjen, seier Kostøl.
Vogntog sperra E39 og E18
Den siste veka har E39 mellom Kristiansand og Stavanger og E18 mellom Kristiansand og Oslo blitt stengde fleire gonger på grunn av vogntog som har fått trøbbel.
Torsdag kveld sto trafikken i nesten tre timar på E18 i Tvedestrand etter at eit utanlandsk vogntog snurra rundt og sto på tvers av vegen. Tilsvarande skjedde også i Telemark.
Dette førte til at vegvesenet og politiet sette i gang ein storstillt aksjon for å luke vekk dårleg skodde vogntog.
Vegvesenet kontrollerte alle køyrety som køyrde austover mot Arendal på E18.
– Det er laga ein skikkeleg beredskapsplan frå vegvesenet og politiet. Det gjeld å komme seg ut når vi veit at vêret vert dårleg, slik at vi kan stoppe bilane før dei kjem ut på europavegen, seier politibetjent Bjarne Lindland.
– Eit vanleg problem
Den rumenske sjåføren snakkar dårleg engelsk. Kostøl prøver å forklare at han må vise at han har kjettingar med seg. Etterkvart forstår han kva han meiner og tek oss med på den andre sida av vogntoget.
Der ligg sju posar. Han løftar den eine opp og dreg ut ein kjetting. Den er blank og ser heilt ny ut.
– Han har dei kjettingane han skal ha, men det er ulik dimensjon på tilhengar og bil, seier Kostøl.
Rumenaren klarer ikkje å svare på kva kjetting som skal på kva dekk. Køyretykontrolløren er ikkje nøgd med svaret.
– Det er litt dumt å stå på E39 og ikkje vite kva kjetting du skal leggje på. Dette er eit vanleg problem, kommenterer Kostøl.
Nekta å køyre vidare
Rumenaren får ikkje køyre vidare før han har bytt ut to av dekka på tilhengaren.
– Han her er nok ikkje ofte i Norge og strevar litt med dette. Dekka på hengaren er slitte, så vi tek han med på stasjonen for å finne to nye dekk, seier Kostøl.
Rumenaren tok køyrenekten med fatning.
– Det er vanskelege forhold når vêret er slik som no, seier Deoli Vasile til NRK.
Politibetjent Bjarne Lindland kontrollerer eit anna vogntog, som er godt skodd og kan køyre vidare.
– Ved tidlegare kontrollar har vi halde att fleire. Vi er her når vêret er verst og då skal dei vere godt skodde. Kjem dei ut på vegane og ikkje er godt nok skodde, så blir dei ståande i bakkane, seier han.
– Korleis reagerer dei dersom dei blir haldne igjen?
– Dei har forståing for det. Dei fleste tek det greit og ventar, seier Lindland.
– Dei veit nok ikkje så mykje om Noreg når dei kjem med sommardekk. På føret som er no er det ikkje bra. Eg veit ikkje om dei sjekkar vêrmeldinga før dei reiser frå landet sitt, men dei bør absolutt ha vinterdekk under slike forhold, seier Lindland.
Denne natta var det kun eitt av dei 20 kontrollerte vogntoga som vart halde att på kaia i Kristiansand.
– Det såg rimeleg greit ut denne gangen, seier Lindland.