– Det betyr at vi har ei form for bestilling til regjeringa om at vi ynskjer firefeltsveg snarast mogleg, seier stortingsrepresentant for Frp i Vest-Agder, Åse Michaelsen til NRK.
Eit fleirtal transportkomite på Stortinget er einige om at ein ny E39 mellom Søgne og Ålgård skal byggast med fire felt.
– Det er ikkje lenger snakk om to eller tre felt, seier stortingsrepresentanten.
I sommar bad Samferdsledepartementet Statens vegvesen om å utarbeide planar for fire felt på ein ny E39. Dette helsar Høgre, Frp, venstre og KrF velkommen.
Staten kan gripe inn
Førstkommande torsdag skal vegutbygginga diskuterast i budsjettdebatten på Stortinget.
– Då vert det endeleg vedteke. Det skal veldig mykje til for at det endrar seg, seier ho.
Målet er å komme i gang med bygging av den nye vegen raskast mogleg. Michaelsen viser mellom anna til at planleggingspengane til den nye vegen er dobla neste år samanlikna med i år.
– Desse pengane skal brukast til planlegging og til å kjøpe areal frå private der vegen skal gå, seier Michaelsen.
Fleire kommunar er allereie i gang med å planlegge trasé for den nye vegen. No vil Michaelsen har fortgang i prosessane ute i kommunane. Samstundes opnar ho for at staten kan gripe inn.
– Dersom kommunane ikkje vert einige er det ei moglegheit for at staten grip inn og vel trasé. Det viktigaste for oss er å bygge vegen raskast mogleg, seier Frp-politikaren.
- Les også: – E39 bremser utviklingen i næringslivet
Vil ha rask avgjerd
Michaelsen understrekar gang på gang at det viktigaste er at vegutbygginga kjem i gang så raskt som mogleg. Ho vil difor ha fortgang i dei enkelte kommunane for planlegging av trasé.
– Vi kan ikkje risikere at åra går og vi ikkje blir einige. Difor er både fraksjonsleiar i Høgre, Linda Helleland, og eg tydlege på at det kan vere aktuelt å bruke ein statleg plan. Det vil seie at staten avgjer kvar vegen skal gå. Kommunane skal sjølvsagt få lov til å vere høyringsinstans, men det er staten som skal avgjere kvar vegen skal gå, seier Michaelsen.
– Ventar du reaksjonar dersom det vert slik?
– Frp har vore eit talerøyr for dette i mange år, så for oss er ikkje dette nytt. For eg trur folk flest ynskjer ei slik løysing dersom det dreg ut i tid, seier ho.