Legionellasmitta er alvorleg sjuk

– Ein av personane er alvorleg sjuk som følgje av at den er smitta av legionella, seier fagdirektør Per Engstrand ved Sørlandet sykehus til NRK.

• LES: Legionella-utbrudd i Arendal

Laurdag vart det slått alarm ved Solhaug bo- og omsorgssenter i Arendal etter at fleire bebuarar hadde pådrege seg luftvegsinfeksjonar. To pasientar fekk påvist legionellasmitte.

Stabilt for den andre

– Tilstanden til den andre pasienten er meir stabil, seier Engstrand.

Begge pasientane får behandling med antibiotika ved sjukehuset i Arendal.

• LES: Ingen nye legionellatilfelle

Dei to personane er truleg smitta gjennom dusjanlegget på omsorgssenteret. Gjennom helga har Arendal kommune gjort fleire undersøkingar for å finne ut kvar smitten har komme ifrå. Det er mellom anna innført dusjforbod.

Kommunen fann mellom anna ein lekkasje i dusjanlegget. Lekkasjen vart funne på eit rom som har stått tomt i lengre tid, skriv Agderposten.

Ikkje fleire smitta

Ifølgje avisa er begge dei to over 80 år.

Førebels er det ingenting som tyder på at fleire er smitta av bakterien.

– Vi ventar ikkje at fleire vil bli smitta. Det verkar som om smittekjelda er funne og at dei har fått stoppa den, seier Engstrand til NRK.