Får ikkje lenger sjukmelde seg sjølv

I 2008 innførte kommunen ei prøveordning der dei kring 1200 tilsette sjølv kunne skrive eigenmelding i opp til 365 dagar når dei er sjuke.

Ordninga har resultert i at sjukefråveret har gått ned og er under landsgjennomsnittet.

Skal evaluerast

– Det er veldig beklageleg at departementet vil ha bort det vi meiner er årsaka til at vi har så lågt sjukefråver, seier ordførar Tore Askildsen til Fædrelandsvennen.

Ordninga har fungert så godt at andre byar har sett til Mandal for å lære.

Arbeids- og sosialdepartementet har gitt dispensasjon frå folketrygda, men no er det slutt. Departementet seier til avisa at dette var eit prøveprosjekt som no skal evaluerast.

Også Kristiansand kommune som har ei ordning med inntil 50 eigenmeldingsdagar må fjerne ordninga, skriv avisa.

Fryktar meir fråver

I fjor skreiv NRK at sjukefråveret er blitt 25 prosent lågare i Mandal samanlikna med 29 liknande kommunar.

Mandalsordføraren fryktar no at sjukefråveret vil auke igjen.

Han grunnar dette med at ein arbeidstakar som vert sjukmeld i 14 dagar mest truleg blir borte i 14 dagar, i staden for å komme tilbake på jobb når han eller ho føler seg frisk nok til å gå på jobb igjen.

Mandal har no søkt om å få halde fram med ordninga.