– Eg meiner det er totalt uansvarleg å ha ein camp og lage ein så stor arena for mindreårige til å gå på fest saman med vaksne, der det er opa alkoholservering, seier leiar for Ungdomsteam i Arendal kommune, Jan Tjønnvåg.
– Eg kan ikkje i mi beste vilje begripe at nokon kan vere ansvarleg for å gjere det, seier Tjønnvåg.
Etterlyser klarare reglar
Hovefestivalen har måtte tole mykje kritikk for fyll blant mindreårige. Under møtet torsdag kom det altså ny massiv kritikk.
Leiar for oppvekstkomiteen i byen, Maren C. Smith Gahrsen (KrF), sat att med følgjande inntrykk etter debatten.
– Utifrå det eg høyrde ynskjer ein klarare reglar for arrangementet som er tydlegare enn dei er no, seier ho.
Eitt av forslaga går ut på å innføre 18 årsgrense på campen.
I dag er nesten 2000 av dei som overnattar her under 18 år. Men festivalleiinga trur det er ei dårleg løysing.
– Blir uansett drikking
– Då kjem dei til å campe i skogen. Då har vi den utfordringa. Då er det betre å leggje forholda til rette og at vi tek hand om publikum og området, seier bookingsjef for Hovefestivalen, Toffen Gunnufsen.
– Det er ei løysing som vi har diskutert med politiet. Vi har fokusert på ein fellescamp, men det vil uansett bli drikking, fordi dei vil drikke i teltet sitt, seier han.
– Ei anna løysing er sjølvsagt å bruke Hove Camping, som er Arendal kommune sin camping, og at dei tek det ansvaret. Men spørsmålet er jo om dei vil det, seier Gunnufsen.
