19-åringen er ilagt brev-, besøks- og medieforbod i alle fire vekene.
Sveinung Søndervik Johnsen er forsvararen til den sikta 19-åringen.
Foto: Lars Eie / NRKMannen samtykka til fengsling under fengslingsmøtet tidlegare i dag.
– Han erkjenner å ha utført handlinga han er sikta for og han aksepterte ei varetektsfengsling, seier forsvarar Sveinung Søndervik Johnsen til NRK.
Døydde av stikkskader
19-åringen er sikta for drapet på ein klassekamerat. Drapet skjedde i eit bustadområde på Ime aust for Mandal sentrum onsdag føremiddag.
Det var Joakim Ophaug Røksland (19) som vart drepen. 19-åringen døydde truleg av fleire stikkskader.
– Dei to var kameratar. Utover det har eg ikkje kommentarar til det. Etterforskinga vil vise kva som var årsaka til det som skjedde, seier Søndervik Johnsen.
Politiadvokat Liv Seland seier til NRK at politiet har danna seg eit bilete av kva som skjedde då 19-åringen vart drepen.
– Vi har beslaglagt eit stikkvåpen på åstaden. Analyser av det vil vise om det er eit drapsvåpen, seier Seland.
Avkreftar IS-koplingar
19-åringen vart pågripen i ein militærliknande uniform onsdag ettermiddag. Etter det NRK kjenner til skal han vere særs interessert i militære effektar og vert omtala som samlar.
Han skal også ha ytra ønske om å kjempe mot IS-styrker som herjar i mellom anna Syria og Nord-Irak. PST stadfestar overfor NRK at dei har vore i kontakt med sikta.
– I forhold til spekulasjonar om IS kan eg avkrefte at det er koplingar til IS. Utover det har eg ingen kommentarar til det no. Vi hentar inn informasjon og kvalitetssikrar den. Det blir feil av meg å kommentere noko knytt til det på dette tidspunktet, seier Seland.
