«Lene Mykjåland gjør fotball sexy», skriv landslagsspelar Trine Rønning på Twitter etter gårsdagens cupfinale mellom Lillestrøm og Trondheims-Ørn.
Lillestrøm vann cupfinalen 3-1 etter å ha ligge under 0-1 til pause.
27-åringen frå Kristiansand scora utlikningsmålet tidleg i andre omgang, og var sentral i snuoperasjonen.
- Les også: – Eg er i lykkerus
– Tre hakk over alle andre
Fotballkommentator og sportssjef i SBS Discovery, Jan-Erik Aalbu, skriv følgjande: «Skal innrømme at jeg ikke har sett mange damekamper de siste årene og aldri sett Mykjåland som midtbanespiller. Banens klart beste #klasse».
Også forfattar og tidlegare justisminister Anne Holt let seg imponere over sørlendingen: «Mykjåland er tre hakk over alle andre. Håper hun smitter lagkameratene i garderoben».
Mykjåland starta cupfinalen på midtbana. I andre omgang gjorde Lillestrøm-trenar Monica Knudsen frå Arendal grep.
Trenaren sende Mykjåland opp som hengande spiss og flytta Madeleine Giske bak på bana. Det gjorde at klubben frå Romerike tok fullstendig kontroll over kampen.
(Artikkelen held fram etter videoen)
Nordlie-skryt til trenaren
– Bytet trenar Monica Knudsen gjorde med Mykjåland og Madeleine Giske meiner eg er avgjerande for kampen. Då kom også Isabell Herlovsen meir til sin rett, sa NRK-kommentator Tom Nordlie.
Lillestrøm var store favorittar før cupfinalen mot Trondheims-Ørn og innfridde. Det betyr at laget har vunne både serie og cup denne sesongen.
Laurdagens cuptriumf var den første for Lillestrøm.