– Det er eit fremragande sjukehus i dag, og vi er kanskje spesielt uroa for at ei freding skal skape hindringar for at vi kan vidareutvikle, byggje om og modernisere huset.
Det seier teknologidirektør Per Torgersen ved Sørlandet sjukehus. Han meiner fredingsvedtaket er utfordrande.
– Det som er den praktiske utfordringa for oss er å finne fram til ein fornuftig måte å handtere verneplanen på, slik at vi likevel kan fortsetje å utvikle sjukehuset i Arendal på ein veldig god måte.
- Les:
Fryktar fleire konsekvensar
Forsvarsbygg har fått jobben med å lage forvaltningsplan for Sørlandet Sykehus Arendal etter at riksantikvaren i februar 2012 freda store delar av utsida og interiøret i det 60 år gamle sjukehuset. Torgersen fryktar fleire konsekvensar av fredinga som kan gå utover pasientbehandling.
Teknologidirektør Per Torgersen ved Sørlandet sjukehus er redd bygningsvernet for sjukehuset i Arendal kan føre til hindringar for mellom anna modernisering og reinhald.
Foto: Lars Eie / NRK– Vi fryktar at det tek veldig lang tid å få godkjent små endringar som vi opplever som meir eller mindre daglegdagse. I tillegg fryktar vi at vi ikkje skal få anledning til å gjere moderniseringar i form av måling, endring av materialbruk, flytting av veggar, dører og den type relativt enkle moderniseringar, som vi er heilt avhengige av.
I konflikt med hygienekrav
I ein førebels rapport peikar Forsvarsbygg på fleire utfordringar. Dette er nokre av dei:
- Keramiske fliser som er brukt i fleire rom, blant anna på pasientbad, kan kome i konflikt med hygienekrav
- Linoleumsbelegget som er brukt på golvet er fleire stader slite og tilfredsstiller ikkje dagens krav til hygiene
- Nokre av fargane som er verna både på golv og veggar er mørke, og opplevast som triste av tilsetje og andre
- Mange av dei opphavlege lampane i vegg og tak gir for lite lys
– God drift kjem framfor vern
42 sjukehus over heile landet blei heilt eller delvis freda samtidig med Arendal Sykehus i 2012. Også ved fleire av dei andre sjukehusa er det blitt søkt om dispensasjonar for å få gjennomført endringar etter fredingsvedtaket.
Hanna Geiran, avdelingsdirektør hos Riksantikvaren, fortel at dei er opptekne av å finne løysingar som gjer at brukarane har det bra.
– Det er heilt opplagt at ein må ha god og moderne sjukehusdrift også i våre freda sjukehus. Det kjem alltid framfor eit vern. Og så ønskjer vi eit godt samarbeid for å finne gode løysingar på dei forholda ein ønskjer å gjere noko med, og det er eg sikker på at vi får til.
Sørlandet sjukehus Arendal er eitt av 42 sjukehus landet rundt som i 2012 blei freda. Dette byr på trøbbel for drifta av sjukehuset.
Foto: Anne Wirsching / NRK
