Lettskremde Basse ante fred og inga fare då han skulle ete salat på ein restaurant, saman med eit japansk tv-team. Så gjekk salaten i lufta.
– Eg øydela meg. Dagen etter kom eg meg nesten ikkje ut av senga. Eg gjekk i tre veker med smerter i ryggen, seier Basse Andersen til NRK.
Det var i mai at japanarane var i Arendal for å lage eit innslag om lettskremde Basse. Dei møtte sørlendingen på ein restaurant.
– Så eksploderte salaten
Utan at han visste noko som helst hadde dei plassert ut fleire kamera i lokalet. I tillegg hadde dei plassert ei lita bombe i salaten som vart servert.
– Eg er jo så dum veit du, og tenkte ikkje på at dei kanskje kom til å skremme meg. Så eksploderte salaten. Det var ei bombegreie som var fjernstyrt. Eg slo rundt meg i stolar og bord, ler han.
Andersen er aktiv i korps i Arendal. Ryggskaden gjorde at han nesten gjekk glipp av 17. mai.
– Fader no ryk heile 17. mai tenkte eg, men eg klarte å karre meg opp, seier han.
– Det var berre moro, herregud. Men det er første gang eg har slått meg. Tenk deg sjølv når det smell i salaten din, ler han.
Vart rikskjendis
Basse vart rikskjendis då NRK.no skreiv om han i desember i fjor. I ettertid har han blitt vist både på tysk og amerikansk fjernsyn. Mellom anna vart deler av reportasjen sendt på The Ellen Show i USA. I tillegg var han gjest i NRK-programmet Lindmo.
– Eg får framleis spørsmål og kommentarar frå folk kvar einaste dag. Eg kosar meg med det og tykkjer det er veldig hyggeleg, seier han.
For eit par veker sidan opplevde han å bli skremt rett utanfor heimen sin i Arendal. Han stod og prata med ein nabo då ein forbipasserande plutseleg skreik inn øyret hans.
– Då kvakk eg og banna og steika. Så var jo dette i kyrkjetid, så eg måtte jo beklage meg til folk som var på veg til kyrkja. Men dei lo av det dei også, men akkurat det var litt ekkelt, ler han.
