– Vi har verkeleg funne forma

– No har vi verkeleg funne forma alle saman. Det er deilig å lukkast litt, seier ØIF-keeper Svenn Erik Medhus til NRK.

Etter ein turbulent fjorårssesong med tidleg cup-exit, trenarsparking og kamp i botnen av tabellen, er situasjonen ein heilt annan denne sesongen.

• Les også: – Vi viser ein fantastisk lagmoral

Ny optimisme

Klubben er klar for kvartfinale i cupen mot Lillestrøm. I tillegg kan dei innta tabelltopp i serien med siger mot Halden på heimebane neste onsdag.

– Eg trur mykje av grunnen rett og slett er at det er ein ny sesong. Vi har lagt bak oss det som skjedde i fjor. I tillegg har vi fått inn nokre gode signeringar, nye spelarar og ny trenar, seier Medhus.

Marinko Kurtovic tok over trenaransvaret i ØIF Arendal i mai.

I tillegg signerte klubben mellom andre landslagsspelar Magnus Jøndal og svenske Marcus Dahlin, som mellom anna har spelt i Meisterligaen.

No drøymer Medhus om cupfinale og klubbens første medalje i eliteserien.

– Det er eit hårete mål, som det hadde vore utruleg gøy å innfri. Vi har og målsetning om å komme til semifinale i sluttspelet. Målet er å vere med på alt heilt inn, seier keeperen.

– Vi sette oss tøffe mål i fjor også. Då klarte vi ikkje å innfri, seier Medhus.

• Les også: No skal ØIF-keeperen tette slusene

Imponerande resultat

Denne sesongen har han tru på at klubben vil klare å nå måla sine.

– Vi veit kva som bur i dette laget. Vi har ei utruleg tru på oss sjølve, men vi veit at det krev ein vanvittig jobb, seier Medhus.

ØIF Arendal har blant anna slått Fyllingen to gonger denne sesongen. I tillegg har dei slått gullfavoritt Elverum.

Einaste tapet så langt kom mot Bodø på bortebane i seriepermieren.