– Fleire av jaktlaga i Gjerstad har avslutta årets elgjakt utan å felle eit einaste dyr. Andre har avslutta etter å berre ha skote ein liten del av kvoten, seier leiar av Gjerstad Viltlag, Helge Røed til Agderposten.
Ifølgje avisa er det berre felt 29 elg i Gjerstad. Der har dei ei kvote på totalt 85 dyr i år. I fjor vart det skote 67 elg i Gjerstad.
- LES: Ulv sett i Lyngdal
I andre jaktområde vert det meldt om gode resultat, men i tradisjonelt gode område har det vore felt færre elg enn normalt. I Åmli har jegerar funne fleire elgkadaver under jakta
– Det litt spesielle i Åmli i år er at vi har funne ein del døde dyr, mykje meir enn vanleg, og spesielt i vestlege delar av kommunen. Det er mistanke om at ulven står bak, utan at eg kan slå det fast, seier Ola Vehus i Åmli kommune til avisa.
Øyvin Froland som er leiar av viltnemnda i Froland og leiar for alle viltnemnder i Aust-Agder meiner ulven må ta mykje av skulda for ei dårleg jakt.
– Det er ikkje tvil om at ulven spelar inn på jakta og kan vere skuld i dårlege resultat fleire stader, seier han til Agderposten.
