Dei ti tilsette hos bedrifta er så å seie aldri borte frå jobb. Sjukefråværet har vore på under ein prosent i mange år.
I 2015 kunne dei skilte med eit sjukefråvær på berre 0,17 prosent.
Til samanlikning var det generelle sjukefråværet i Noreg i 2014 på 7,1 prosent ifølgje NHO.
- Les også:
14 år sidan førre skade
På veggen i meieriet heng eit teljeapparat som lyser med raud skrift antal dagar sidan sist skade. 5100 dagar. Eller 14 år, om du vil.
Det meiner meierisjef Tor Kåre Helland er noko av grunnen til at sjukefråværet er så lågt. I tillegg til eit godt arbeidsmiljø.
– Folk passar på og hjelper kvarandre, alle blir sett. Vi er veldig avhengig av at alle er på jobb heile tida for at vi skal få gjennom produksjonen.
Tilsett Arnt Tore Gautestad har ei noko anna forklaring på det låge sjukefråværet.
– Det er ein stor andel honndølar her, det kan jo vere det. Vi er jo eit hardbarka folk, seier han om sambygdingane frå Hornnes.
- Les også:
– Finst ikkje liknande
Direktør i NHO Agder, Siri Mathisen, er imponert over tala.
– Maken til historie kjenner vi faktisk ikkje til. Eit så lågt skadenivå, og ikkje minst eit så utruleg lågt sjukefråvær over ei så lang tidsperiode finst ikkje.
Ingunn Foss frå Stortingets næringskomite trur meieriet i Setesdal har funne sukessoppskrifta.
– Folk her er veldig stolte av arbeidsplassen sin, tek vare på den og vil helst vere her. Det er klart at den oppskrifta kan brukast på alle arbeidsplassar.