– Det er ikkje så lett i med tanke på at marknaden er knallhard i forhold til høge lønningar i Aust-Europa og Balkan, seier sportsleg leiar Peder Langfeldt til NRK.
I desember i fjor skreiv tidlegare landslagssjef Gunnar Pettersen under ei intensjonsavtale om å bli ny trenar i klubben. For at Pettersen skal skrive under må Vipers hente inn spelarar som dei har førespegla han.
Droppar pengekåte spelarar
Klubben har allereie fått nei frå landslagsspelar Tonje Nøstvold.
Langfeldt stadfestar overfor NRK at klubben er i samtaler med fleire spelarar. Samstundes vedgår han at det er utfordrande å sikre spelarar frå øvste hylle.
– Dei som går etter pengar kjem ikkje til Vipers. Men dei som ynskjer å utvikle seg til å bli veldig gode handballspelarar håpar vi å kunne vere med å kjempe om, seier han.
Måndag skreiv strekspelaren Susann Iren Hall under ei ny to års kontrakt med Vipers Kristiansand. I januar forlenga danske Annette Jensen si kontrakt.
Jaktar over heile Europa
No held jakta på nye signeringar fram.
– Vi jobbar i alle leiarar og jobbar med eit stort kontaktnett i heile Europa. Dessverre er det ikkje så mange svært gode spelarar ledig. Det er ein kamp om dei beste spelarane, seier Langfeldt.
Parallelt jobbar klubben med å styrkje seg økonomisk for å få råd til dei beste spelarane.
– Dei spring som gale på kontoret for tida. Det går veldig bra etter dei signala eg har fått. Det verkar veldig positivt, seier han.