– Eg vil kalle dette århundrets bursdagsgåve, seier Blix til NRK.
Han er særs rallyinteressert og reiser så ofte han kan for å få med seg løp for å ta bilete. På 42 års dagen hans fekk han endeleg draumen oppfylt.
– Interessa for rally er vel godt over middels for å seie det slik, seier Blix.
Søvnlause netter
Han skulle vere kartlesar for rallysjåfør Arnt Gustav Olsen i eit løp i Sørlandsparken i Kristiansand.
– Eg er nervøs. Det har vore nokre netter med lite søvn, sa han før han sette seg i bilen.
Olsen som skulle køyre bilen var optimist før start.
– Eg stolar på han. Dette må han kunne klare. Men ein veit jo aldri når farten blir stor og det blir varmt inne i bilen. Han kan jo klikke på ein eller annan måte, men det bør absolutt gå bra, seier han.
I lykkerus
Og det gjorde det. Etterpå var bursdagsbarnet høgt oppe. Duoen gjekk nemleg til topps i løpet.
– Det var heilt sjukt. Det er det råaste eg har vore med på. Heilt vanvittig, seier han.
– Desse bilane er rå. Du har ein puls som er heilt oppe i taket. Dette slår det meste, sa Blix.