Totalt 81,7 prosent av førehandsstemmene i Arendal seier nei til eitt Agder. Berre 15,9 prosent seier ja til eitt Agder. Totalt er det registrert 5095 førehandsstemmer i Aust-Agders største by.
– Fantastisk
– Det er heilt fantastisk. Men vi må nok rekne med at talet går noko ned når alle stemmene er telt opp. Men det var nok litt høgare enn eg hadde trudd, seier leiar for nei-aksjonen, Jan Rudy Kristensen til NRK.no.
I Grimstad er det berre eit knapt fleirtal mot eitt Agder. 53 prosent av dei som har førehandsstemt har stemt nei, medan 41 prosent har sagt ja til eitt Agder. Totalt 2471 personar har førehandsstemt der.
– Dette var skuffande. Arendal var det jo eit overveldande fleirtal imot. Det var overraskande høgt, seier Knut Dannevig i ja-aksjonen.
Ja i Valle
– Det var jo gledeleg at det var omtrent 50–50 i Grimstad. Der har det vore sterkt motstand. Men vi må jo vere klar over at dette berre er førehandsstemmer, seier han.
I Valle kommune er stemninga eit heilt anna enn i Arendal. Heile 72,5 prosent av dei som har stemt seier ja til eitt Agder. 25,5 prosent seier nei til eitt Agder.
I Gjerstad er motstanden mot samanslåing stor. Heile 81,3 prosent av førehandsstemmene seier nei til eitt Agder. 14 prosent har stemt ja. Det er registrert 257 førehandsstemmer.
Motstand i Risør
I Risør seier 72,7 prosent av dei som har førehandsstemt nei til eitt Agder. 21,3 prosent seier ja. 545 personar har førehandsstemt.
I Åmli seier 67,5 prosent av dei som har stemt på førehand nei til eitt Agder. Berre 25,2 prosent seier ja. Berre 123 personar av 1397 stemmeberettiga har førehandsstemt.
I Evje og Hornnes kommune seier 75,5 prosent ja til samanslåing av dei to fylka. 21,6 prosent seier nei til samanslåing. Her er alle stemmene telt opp.
Både Dannevig og Kristensen hadde lita tru på samanslåing då vi snakka med dei tidlegare på kvelden.
– Dei siste meiningsmålingane tilseier at det vert nei. Eg tippar at vi endar på 58,42 prosent imot ei samanslåing av Agder-fylka, sa Knut Dannevig.