Rosar yrkessjåføren for rask handling i tunnelbrannen

Vogntoget var på veg frå Måløy til Florø med bensin, då hengaren med 16 500 liter losna, trilla i tunnelveggen og seinare eksploderte .

Sekund før varsla førar Tore Myrestrand varsla naudetatane og stogga trafikken på veg inn i 1,9 kilometer lange Skatestraumtunnelen. Han var framleis i tunnelen under den første eksplosjonen.

• Les også: Kommunen opprettar kriseteam

– Eg er imponert over kor raskt han handterte dette. Ikkje berre det, men at han sleppte køen forbi seg før han gjekk inn i tunnel viser at han er føre var, seier Rolf Olav Tenden i Norges Lastebileigarforbund.

– Berga mange liv

Seks personar vart sendt til sjukehus, av desse tre personar med lettare skader. Ni personar på begge sider av tunnelen vart evakuerte.

Tenden meiner Myrestrand skal ha ein stor del av æra for at det ikkje gjekk verre.

• Les også: Dette er alt som er att av hengaren

– Absolutt. Spesielt at han sleppte forbi ferjekøen før han byrja inn i tunnelen med fullt bensinlass. Det berga mange liv i dag. Hadde det vore tre-fire-fem personbilar bak, så hadde dette vore ei kjempeulukke, seier han.

God og rask innsats

– Det er eit godt eksempel for korleis ein yrkessjåfør skal opptre på vegen. Eg kan berre skryte av han. Dette var veldig godt jobba, legg Tenden til.

Assisterande fylkesmann Gunnar Hæreid stiller seg bak rosen og adresserer den også til redningsmannskap og privatpersonar.

Det same gjer også varaordførar Nina Grotle i Bremanger og ekteparet Carla og Quirinus Adrichem som Myrestrand jaga ut av tunnelen.

• Les også: «Ut! Ut! Ut! Tanken lekker»
• Les også: Ektepar såg flammane komme imot dei i tunnelen

– Det er tydeleg at nokre har gjort ein god og rask innsats på staden. Som han sjåføren. Han hadde hovudet på rett plass, seier Hæreid.

Gudvangen friskt i minne

Hæreid seier ein har brannen i Gudvangatunnelen friskt i minne. Då vart kring 70 menneske sendt til sjukehus etter at eit utanlandsk vogntog byrja å brenne midt i den 11,5 kilometer lange tunnelen.

• Les også: Ingen fare for tunnelkollaps

Han seier ulukker i tunnelar er noko som etatane med beredskapsansvar er veldig obs på.

– Ein blir fanga i tunnelen, og lufttrykket og eksplosjonstrykket har berre to vegar å gå. Er du nær nok eksplosjonen, så kan ein omkomme. Her skjedde eksplosjonane rett etter at folk hadde kome seg ut, seier han.

Aldri høyrt om liknande

Det er førebels uvisst kvifor hengaren losna i Skatestraumtunnelen. Dagleg leiar i Måløy Havneservice, som eig vogntoget, seier hengaren nyleg var til kontroll.

– Gjennom mi 40 år lange historie i bransjen har eg aldri vore borti eller høyrt liknande historie. Det er veldig spesielt, seier Tenden.